Tervetuloa työvälitystoimisthoon!

Transkriptio

1 Välkommen till Arbetsförmedlingen! Information till dig som är arbetssökande Meänkieli Tervetuloa työvälitystoimisthoon! Information till dig som är arbetssökande Informasjuunia sulle joka olet työnhakija Työvälitystoimisto on auki kaikile jokka hakevat töitä ja kaikile jokka hakevat uusia työntekijöitä. Täälä met selitämä kuinka met saatama auttaa sinua saahmaan työn ja mitä sie itte saatat tehhä ette saa työn.sivula arbetsformedlingen.se löyät lissää tietoja. Sie olet aina tervetulonen soittamhaan eli käyhmään Työvälitystoimistossa. Met annama sulle sen tuen mitä sie tarttet riippumatta minkälaisia tarpheita sulla on. Mutta muista ette se on sinun oma insatsi joka on tärkein. Sen enemän aikaa sie panet työnhakhuun sen suuremat maholisuuet sulla on ette saa työn missä viihtyt. Kaikki vaphaat työt ei ilmoteta Työvälitystoimisthoon ja sen takia kannattee hakea töitä monela eri tavala, esimerkiks muitten veppisivuitten, kaveritten ja ystävitten kautta. Kaikki meän palvelut on ilmhaiset.

2 Tämä on Työvälitystoimisto Kuinka paljon apua tarttee siihen työnsaanthiin vaihtelee. Muutamille riittää ette hakea töitä itte ja met olema tukena. Toiset tarttevat enemän apua ennen kun net on valhmiit hakemhaan työmarkkinhaan. Kun kontaktaat meitä saat aina puhua yhen työnvälittäjän kans joka antaa sulle tukea ja apua. Yhessä tuletta sovinthoon mitä sie tarttet ette löytää työn niin kätevästi kun maholisesti. Löyä työ meän veppipaikalta Paikkapankosta saatat hakea töitä ja tilata työanonsia. Täältä löyät suuren osan kaikista vaphaista töistä. Paikkapankko on meän veppipaikala ja appina sulle jolla on smartfooni. Muista ette on muita veppipaikkoja mistä saatat hakea töitä kans. Sie löyät länkit niihin arbetsformedlingen.se. Ammatti ja tulevaisuus fliikin alla (Yrke och framtid ) löyät Ammattija A-Ö ja Ammattikompassi (Yrkeskompassen) joka sisältää informasjuunia kohta kaikista viroista, kuinka tulet päteväksi niihin ja kuinka tulevaisuus näyttää jokhaisessa virassa. Sie löyät kans informasjuunia koulutuksista ja testistä jokka saattavat inspireerata sinua kun valittet ammattia. Täälä on kans informasjuunia aktiviteetistä ja informasjuuni tapaamisista Työvälitystoimistossa. Muun fliikin alla veppipaikala, Cv ja hakemus (Cv och ansökan), saat vihjeitä ja tipsiä kuinka sie kirjotat cv:n ja henkilökohtasia preiviä. Sielä on kans filmiä kuinka sie haet töitä ja suuriin osa siittä mitä kannattee tietää ennen sinun työsopimushaastattelua. Viimi sivuila tässä tokymentissä saat esimerkkiä minkä näkönen cv ja henkilökohtanen preivi saattaa olla. Kohtaa työnantajia Met järjestämä rekrytointitapaamisia missä saat kohata työnantajan joka tarttee henkilökuntaa. Kun vierailet yhtä rekrytointikohtausta on hyvä jos otat mukhaan sinun cv:n (mielelhään monta kopiaaki) jonka saatat jättää kiinostunheile työnantajille. Työvälitystoimistossa (arbetsformedlingen.se) on lista kaikista nykyaijan rekrytointitapaamisista. Lue työpaikka-anonsia Paikkasjurnaalissa Paikkasjurnaali on avisi missä on työpaikka-anonsia sulle joka haet töitä. Avisissa saat kans tipsiä uusista työelämän tievalinoista. Sie saat sen lisäki inspirasjuunia ja iteoita kuinka sie onnistut kun haet töitä. Avisi on ilmhainen, ja sie löyät sen työvälitystoimistoista, kirjastoista, isomista rautatieasemista, tietyistä lentokentistä, korkeakouluista ja yliopistoista ympäri maata. Jos haluat saa kotia avisin sie saatat tilata sen. Se ei maksa mithään. Veppipaikala arbetsformedlingen.se sie saatat lukea Paikkasjurnaalia veppiavisina.

3 Työskentellä ulkomaila Jos haet töitä Euroopassa met saatama auttaa sinua informasjuunin kans kuinka sie parhaiten onnistut tämän kans. Meilä on työnvälittäjiä jokka on spesialistia Euroopan työalueela. Meän rekrytointipäivinä ja työmessuissa saatat kohata työnantajia jokka hakevat henkilökuntaa ulkomaan töihin. Sie löyät työt jokka on ilmotettu kaikhiin eurooppalaishiin työvälitystoimisthoin Paikkabankissa. Met tarjoaama kaikile työnhakijoile tukea, tipsiä ja neuvoja meän työnvälittäjiltä informasjuunia kuinka sie haet töitä apua kirjottaa cv:n ja valmistautua työhaastattelhuin käyttöoikeus kaikhiin Paikkabankin vaphoin töihin ehotuksia vaphaista töistä rekrytointitapaamisia työnantajitten kans informasjuunia viroista ja opinoista verestä työmarkkinan informasjuunia neuvoja kuinka starttaa oman yrityksen

4 Kun tarttet lissää apua Välistä tarttee lisäapua kun hakkee töitä. Jokku tarttevat sen alusta asti, muutamat vain vähän aijan päästä. Sie ja sinun työnvälittäjä kattovat yhessä mikä tuki soppii sulle parhaiten ette sie saat niin kätevästi kun maholisesti yhen työn. Met saatama auttaa sinua monela eri tavala. Lue lissää meän kaikista insatsista, ohjelmista ja tukipalkatuista töistä meän veppipaikalta. Vaikea löytää työtä Välistä saattaa paras tie uutheen työhön olla harjottelupaikan kautta, työmarkkinakoulutus eli apu ette startata oman yrityksen. Jos sinun työnvälittäjä arvostellee ette sie saatat saa hyötyä siittä tuesta niin tet keskusteletta sen yhessä. Jos olet ollu pitkhään poijessa työmarkkinasta sie saatat olla matkassa työ- ja kehityskarantiissa ja ottaa ossaa niistä toiminoista jokka on sovelettu just sulle. Toiminat pitävät auttaa sinua saahmaan työn niin kätevästi kun maholista. Sie joka olet 16 ja 24 vuoen iässä ja et ole löytäny työtä kolmen kuukauen sisälä saatat osalistua nuoritten työkaranthiin. Saat sillon olla osana toiminoista kuin ammattiopastuksessa, työkokheessa ja koulutuksessa. Nuori ja ilman työkokemusta Sie joka olet alle 25 vuotta saatat saa oppia uuen ammatin työnantajan tykönä ja saa palkkaa samala kun sie saat ohjausta eli koulutusta. Työsuhetta kuttuthaan ammattiopastuksen työsuheksi. Alenettu työkyky Sie saatat saa apua sinun työnvälittäjältä jos sulla on saihraus eli vamma joka vaikuttaa sinun työkykhyyn. Meän työelämän suunatut rehabiliteerinki spesialistit saattavat kans autta sinua sen kans mikä on tärkeä työlistämisen ennen ja aikana. Met lähemä aina sinun tioista ja kokemuksista, ja met saatama helpottaa työlistämisen monela tavala. Se saattaa koskea ette sovittaa työpaikkaa, tarjota henkilökohtasta tukea eli antaa ekonoomista korvausta sinun työnantajalle. Uusi Ruottissa Jos olet vasta tullu Ruothiin sulla on oikeus erikoishiin insatshiin ja ohjelmhiin. Sulla saattaa kans olla oikeus erikoishiin aktiviteethiin ette niin kätevästi kun maholista saa oppia ruottia, saa työn ja saattaa elättää ittensä. Sie ja sinun työnvälittäjä tulevat yhessä sovinthoon mikkä toiminat sopivat sulle parhaiten.

5 Sinun työnantaja saattaa saa korvausta Työnantajat saattava saa ekonoomisen korvauksen kun het työlistävät henkilöitä jolla on vaikea saa työn. Ensi käessa se koskee nuoria ilman työelämänkokemuksia, pitkän aijan työttömiä, vasta tulheita Ruothiin ja henkilöitä jolla on joku fynksjuunin heikkous joka vaikuttaa työkykhyyn. Erikoinen työlistämistuki sulle joka olet ollu ilman työtä pitkhään Jos olet ollu ilman töitä pitkhään ja olet mukana työ- ja kehityskarantiissa sillon työnantaja saattaa saa ekonoomisen tuen mitä kuttuthaan erikoiseks työlistämistueks kun saat työsuhteen. Tarkotus tuela on ette sulla jolla on vaikea saa työn helpomin saat työsuhen. Sinun työnantaja saattaa saa korvauksen korkeinthaans kakstoista kuukautta. Alkhuunpääsy työ sulle joka olet uusi Ruottissa Jos olet vasta tullu Ruothiin ja on olemassa oleskelulupa sillon työnantaja saattaa saa ekonoomisen tuen mitä kuttuthaan erikoinen työlistämistuki trappuaskeltyöhön (instegsjobb) kun sinun työlistethään. Samala aikaa kun olet töissä saat lukea ruottia siirtolaisile (sfi). Sillä tavala sie saat sekä kokemuksia työmarkkinoilta ja referensiä joista sulla saattaa olla hyötyä tulevaisuuessa. Uusstarttityö sulle joka tarttet alkaa uuesti Jos olet ollu ilman töitä pitemän aijan eli olet uusi Ruottissa sinun työnantaja saattaa saa ekonoomisen tuen mitä kuttuthaan uusstarttityö eli erikoinen uusstarttityö. Työnantaja saapi tavalisesti korvauksen yhtä pitkhään kun sie olet ollu työtön, mutta on olemassa maksimirajoja. Jos olet vasta tullu Ruothiin sinun työnantaja saattaa korvauksen sinun kolme ensi kuukausina Ruottissa. Tuki sulle jolla on heikentyny työkyky Jos sulla on heikentyny työkyky ja syy on toiminanheikkous sinun työnantaja saattaa saa erinlaista ekonoomista korvausta riippuen mikä tominanheikkous sulla on ja minkä kans sie tarttet lisäapua. Se saattaa esimerkiks olla palkantukea ja tukea työpaikan apuvälinheishiin. Työopastus sulle joka olet nuori ja haluat oppia yhen viran Jos olet alle 25 vuotta ja ei ole ammattikokemuksia sillon työnantaja saattaa saa ekonoomista korvausta samala kun sie saat maholisuuen oppia ammatin. Työsuhetta kuttuthaan ammattiopastus työsuhteeksi. Sie saatat saa työsuhteen jos olet ollu työtön vähhiinthääns kolme kuukautta. Vähhiinthääns 15 prusenttia työaijasta pittää olla koulutusta eli opastusta. Työsuhe häätyy toimia vähhiinthääns kuus kuukautta ja työnantaja saattaa saa korvauksen korkeinthaans 12 kuukautta. Ennen kun työnantaja saattaa saa korvauksen häätyy olla keskeinen työehtosopimus ammattiopastuksesta.

6 Näin pääset käynthiin Sie saatat ottaa yhteyttä meihin monela eri tavala. Piian sie haluat alkaa menemällä meän veppipaikhaan ja lukea lissää. Sie saatat kans soittaa ja puhua työnvälittäjän kans suohraan. Eli tulla käyhmään jossakin meän työvälitystoimistoissa. Valitte mikä soppii sulle parhaiten. Jos haluat hakea työttömyyskorvausta eli ottaa ossaa meän ohjelmista sie häyt kirjottaa sisäle itten Työvälitystoimisthoon. Kirjota sisäle itten Kun kirjotat sisäle sie alotat luomalla kontun Minun sivula (Min sida) arbetsformedlingen.se. Täytä sitten tietoja sinusta ittestä ja mitä sie olet tehny aiemin. Sie tehet sen kotona eli yhessä Työvälityksentoimiston taatturissa. Sen jälkhiin sie häyt vieraila 14 päivän aikakautena yhtä työnvälitystoimistoa missä kohtaat työnvälittäjän joka kirjottaa sinun sisäle. Vasta sillon sie olet sisäle kirjotettu meän tykönä. Työvälittäjä arvostellee sen jälkhiin kuinka sinun maholisuuet ette saa työn on ja jos sie tarttet enemän apua alusta lähtien. Lisä apu saattaa merkitä ette sulla on kontakti sinun työnvälittäjän kans useamin ja piian kans otat ossaa meän eri ohjelmista, esimerkiks harjottelua työnantajan tykönä eli työmarkkinakoulutuksessa. Se on tärkeä ette meilä on meän systeemissä aina ajankohtasia ja vereksiä tietoja sinusta. Valvo sen takia ette sie aina uuistat sinun meriitit varsin kun olet saanu uusia kokemuksia jokka lissäävät sinun maholisuuksia saa työn. Sillon met saatama helpomin auttaa sinua löytämhään oikean työn. Kun kirjotat sisäle meän tykönä sie piät ottaa mukhaan lekitimasjuunin sekä totistukset ja arvosanat jokka näyttävät mikkä työt sulla on ollu ja mitä sie olet opiskellu. Toimintasuunittelu Kun olet kirjotettu sisäle sie tulet tekemhään tominansuunitelman sinun työvälittäjän kans. Toiminansuunitelma on sopimus sinun ja Työvälitystoimiston kans millä tavala met saatama auttaa sinua ja mitä sie piät tehhä ette saa työn. Työttömyysvakkuutus Jos sie olet ollu töissä eli olet töissä Ruottissa sie olet osana työttömyysvakkuutuksesta. Se merkittee ette sie saatat anoa työttömyyskorvausta a-kassasta jos tulet työttömäksi. Ennen kun saat korvauksen sie häyt täyttää vissiä ehtoja. Jos olet työtön eli olet riskissä ette tulla siksi se on erittäin tärkeä ette sie tunnet ehot. Muuten sie saatat menettää korvauksen. Työttömyyskorvauksen anomuksen sie lähätät sinun a- kashaan, joka päättää jos sulla on oikeus korvauksheen. Lue lissää työttömyysvakkuutuksen säänöistä ja ehoista arbetsformedlingen.se.

7 Ota yhteyttä 1. Soita ja puhu työnvälittäjän kansa. 2. Lähhiin työvälitystoimisto. Täälä sie saatat puhua työnvälittäjän kans ja saa tipsiä kuinka sie haet töitä parhaimalla tavala. Sie saatat kans käyttää meän taatturia työnhaussa ja kirjottaa cv:n ja henkilökohtasia preiviä. Sivula arbetsformedlingen.se sie saatat nähhä missä lähhiin työnvälitystoimisto on. 3. Arbetsformedlingen.se. Täältä sie löyät muun muassa Paikkapankin missä on paljon vaphaita työpaikkoja koko maassa. tipsiä kuinka sie kirjotat cv:n ja henkilökohtasia preiviä. Informasjuunia toiminoista, esimerkiks rekrytointitapaamisia. Aktiivisuusraportti Se on tärkeä ette sie olet aktiviinen kun haet töitä. Met tarttema tietää mitä töitä sie olet hakenu ja mitä muuta sie olet tehny ette saa työtä ja sen perustalla met saatama antaa sulle oikean tuen. Jos sie esimerkiks olet ollu rekrytointitapaamisessa eli työhaastattelussa met tarttema tietää sen. Sie selvität sinun aktiviteetit yhessä aktivisuusraportissa. Helpoiten sie täytät sen sivula arbetsformedlingen.se. Aktivisuusraportti on hyvä tuki kun sie ja sinun työnvälittäjä suunitteletta kuinka sie jatkat sinun työnhaussa ja saat työt. Kaikki informasjuuni aktivisuusraportista ja kuinka sen täyttää löyät meän veppipaikalta. Tietoja sinusta meän rejisterissä Kun kirjotat sisäle itten meän tykönä jokkut tiot rejistreerathaan sinusta meän rejisterissä, esimerkiks nimi, osote, henkilönumero, työelämänkokemuksia ja meriittiä. Met rejistreeraama kans mikkä työt sie haet ja mitä tapahtuu sillä aikaa kun haet töitä. Sinun tiot on salhaiset. Se merkittee ette tiot ei saa jättää ulos asiattomille. Mutta meilä on velvolisuus ette jättää ulos vissiä tietoja Vakkuutuskassale ja a- kassale kun net tekevät päätöksiä. Herkkiä tietoja met emmä saa rejistreerata ilman sinun hyväksyntää, esimerkiks tietoja sairhauesta. Se on vain sinun työnvälittäjä joka saapi käyttää sinun henkilötietoja kun se on töissä sinun asian kans. Ja se on sie joka päätät mikkä tiot saapi jättää ulos sinun työnantajalle. Sie saatat aina tahtoa nähhä mikkä tiot on olemassa sinusta. Jos löyät jotaki joka on väärin se on tärkeä ette sie sanot sen meile. Kolme vuotta jälkhiin kun sinun asia on lopetettu meän kaikki tiot sinusta otethaan poies rejisteristä. Ilmota osotemuutosta Työvälitystoimisto ei saa auttomaattisesti tietoja jos sie muutat osotetta. Sie häyt itte ilmottaa meile kun muutat osotetta. Ilmota Työvälitystoimisthoon vaikka olet tilapäisesti muussa osotheessa.

8 Työnhaku tekniikka On olemassa paljon mitä saatat tehhä itte joka auttaa sinun saahmaan uuen työn. Kaikhiin tärkein on ette sie olet aktiivinen. Tässä saat tipsiä kuinka sie saatat tehhä. Ota apua Työvälitystoimistolta jos tarttet lissää neuvoja. Vastaa työanonshiin Paikka-anonsia on monessa eri paikoissa, esimerkiks vepilä, avisissa Paikkasjurnaali ja päivälehissä. Sivula arbetsformedlingen.se löyät Paikkapankin, joka sisältää anonsia vaphaista töistä Ruottissa ja ulkomaila. Sie saatat kans tilata paikka-anonsia ja saa e-postia kun tullee työ joka soppii sulle. Kirjastossa ja vepilä on sen lisäks aikakauslehtiä ja ammattiavisia missä on paikka-anonsia erityisillä aloila. Kun kirjotat hakemuksen tavote on tietysti ette herättää työnantajan kiinostuksen ja ette sinua kuttuthaan haastatelhuun. Lue tarkoin sen mitä anonsi sannoo ja se informasjuuni mitä on työnantajan veppipaikala. Hunteeraa mikkä on sinun hyvät puolet ja mikkä saattavat olla euksi justhiins siinä työssä ja minkälaisen komppetensin sie saatat tarjota työnantajalle. Työhakemus saattaa olla monela eri tavala, ja se on suureks osaks sinun tahto joka määrää minkälaisen sie haluat mookata. Mutta välistä työnantajalla on vaatimuksia eli toivomuksia ette työhakemus pittää kirjottaa tietylä tavala ja sisältää vissiä tietoja. Se on esimerkiks tavalista ette työnantaja haluaa ette sie rejistreeraat sinun meriitit heän veppipaikala ja liität matkhaan fiilin missä on preivi minkä olet kirjottanu. Puhu kaveritten ja tuttavitten kans Monet työt välitethään kaveritten ja tuttavitten kautta. Selitä sen takia niile ketä tunnet ette sie haet töitä. Piian tarvithaan enemän henkilökuntaa heän työpaikala? Piian net saattavat tipsata sinua työstä? Eli piian net tuntevat jonku joka saattaa ottaa vasthaan sinun harjottelijana. Levitä sinun cv Moni työnantaja hakkee uusia työntekijöitä erikoisissa intternetin cv-tietokannoissa. Sen takia on hyvä rejistreerata cv:nsä monessa sellaisissa veppipaikoissa. Muista ette pittää sinun cv vereksenä ja lissää uusia tietoja ette se aina kuvvaa sinun nykytilanetta. Veppisivula arbetsformedlingen.se sie saatat tarjota sinun cv:n työnantajille. Sielä löyät kans mallia ja esimerkkiä kuinka ja minkä näkönen cv saattaa olla. Sise saatat kans rejistreerata sinun cv:n sivula eures.europa.eu jos haet töitä ulkomailta. Sielä on kans eurooppalainen työn tietokanta. Tämän brosjyyrin lopussa saat tipsiä kuinka ja minkä näkönen cv ja henkilökohtanen preivi saattaa olla. Hae töitä sosiaalisen meetian kautta Hyvä tapa millä ulottuu monhiin ihmishiin kätevästi on ette käyttää sosiaalista meetiata. Tänä päivänä tullee aina tavalisemaks ette selittää Facebookissa, Twitterissä ja Linkedinissä ette sitä hakkee töitä. Piian sinun kaverit ja seuraajat saattavat tipsata sulle työstä eli selittää heän tuttaville ette sie haet töitä.

9 Hae töitä miehitysfirmoista Miehitysfirmat ottavat henkilöitä töihin ja sitten net vuokraavat niitä yrityksile ja orkanisasjuunile. Miehitysfirman töissä oleminen tarkottaa useasti ette sie olet töissä eri asiakhaitten tykönä. Sinun palkan maksaa miehitysfirma. Jokku tehtävät on pitkät, usseita kuukausia ja vuosiaki. Toiset taas on lyhempiä. Joskus työ miehitysfirmassa johtaa siihen ette joku työnantaja ottaa sinut töihin. Kontaktaa työnantajan suorhaan On olemassa paljon töitä mitä ei anonseerata. Räknäthään ette enemän kun puolet työpaikoista panthaan muula tavala kun anonsila, esimerkiks kontaktitten kautta, verkosto eli henkilökohtasia tapaamisia työnantajan kans. Kun haet työtä mitä ei ole anonseerattu se saattaa olla vaikeampi tietää mikä on hyvä nostaa esile. Sinun pittää ottaa selvile niin paljon kun maholista työpaikasta ja mitä se ammatti sisältää ette sillä tavala nostattaa maholisuuet ette kirjottaa oikein hakemuksen. Ota sitten yhteyttä sen työnantajan kans missä haluat olla töissä ja ilmota sinun kiinostuksen. Vaikka ei ole vaphaita töitä justhiins varsin se saattaa tulevaisuuessa johtaa työhön. Älä unohta ette aiemat työnantajat on hyvät olla kontakissa jos haluat löytää työn. Työnantaja tietää kuka sie olet ja mitä sie saatat, ja saattaa helpomin nähhä jos on työtehtäviä jokka saattavat sopia sulle.

10 Minkäs näkönen työhakemus on? Työhakemus sisältää usseimiten yhen cv:n ja henkilökohtanen preivi. Se on tärkeä ette sinun cv ja preivi täyentävät toisia, niin ettei seiso sama asia molemissa. Välistä työnantaja saattaa haluta kattoa muita tokymenttiä, esimerkiks arvosanat, totistukset, lisensit eli työkokheet. Veppipaikala arbetsformedlingen.se fliikin alla Cv löyät lissää tipsiä ja neuvoja kuinka sie tehet. Sieltä kans löyät filmiä missä on suoria konkreettia esimerkkiä. Kun uusi työ anonseerathaan ei ole harvinaista ette monta sattaa hakemuksia tullee sisäle. Sinun hakemus antaa työnantajalle eli työvoiman hankkijalle kuvan sinusta mikä sitten on perustana ketä hakijoita kuttuthaan haastattelhuun. Usseimiten se ei mene kun sekuntia työnantajalle eli työvoiman hankkijalle ette päättää jos sie olet kiinostava työhön eli ei. Alota sen takia sillä mikä on kaikhiin kiinostaviin työnantajalle, esimerkiks miksi työnantaja pittää palkata justhiins sinun. Cv curriculum vitae Cv merkittee curriculum vitae. Se on latinaa ja tarkottaa elämänkertakuvvaus. Cv:ssä pittää kuvata sinun koulutuksen, työkokemukset, tietoja ja taitoja mitä haluat nostaa esile. Se on tärkeä ette sinun cv on helppo käyä läpi. Sen takia saattaa olla viisasta ette tehhä valikoiman ja ottaa vain mukhaan net työt jokka on erittäin tärkeät virale. Sillon saatat kirjottaa valikoima otsikon jälkhiin: Työkokemus. Sulla pittää kans olla referensiä, mutta saatat sanoa ette sie jätät net myöhemin. On olemassa eri cv:n tyyppiä. Tavalisiin on ette alethaan kirjottamhaan siittä mitä on tehny viimiseks ja sitten mennä takashiin päin aijassa. Mutta sie saatat kans kirjottaa sinun cv:n erikoisen teemoitten perustheela. Sillon kirjotat tietyn tyypin työstä yks kerrala. Piian ensiks töistä missä olet ollu lasten kans tekemisissä ja sitten töistä missä olet ollu kaupassa. Kirjota otsikkoja, esimerkiks Työelämän kokemus kaupan alala ja lissää tekstilä. Jos olet ollu töissä muissa maissa kun Ruottissa saatat alkaa otsikolla Kokemus muista maista. Sillä tavala näytät työnantajalle minkälainen laajuus sulla on. Älä unohta ottaa mukhaan jos on harjottelutöitä, eli praktiikkaa. Cv pittää olla suunile korkeinthaan kaks A4-sivua. Henkilökohtanen preivi Henkilökohtasessa preivissä kirjotat muun muassa miksi sie olet hakenu työn, miksi se virka eli ammatti sopisi sulle ja miksi sie haluat olla töissä just tämän työnantajan tykönä. Ajattele ette mookata preivin spesifiikin anonsin mukhaan. Se merkittee ette sie häyt kirjottaa uuen preivin joka työle mitä haet. Henkilökohtanen preivi ei piä olla pitempi kun yks A4-sivu.

11 Näin kirjotat cv:n SARA ÖBERG Roslagsgatan Stockholm sara.oberg@mail.com linkedin.com/saraoberg LYHYESTI Tässä saatat nostaa esile mitä olet tehny aiemin yhessä eli muutamassa meininkissä. Sillon työnantaja saapi kätevän kuvauksen kuka olet. Esimerkki: Muotista kiinostunu kaupanapulainen jolla on pitkä kokemus nuoritten vaatheista ja trendistä. TYÖKOKEMUS Titteli, yritys, esimerkiks Kauppa-apulainen H&M:ssä. Kaupunki, aikakausi, esimerkiks Stokholmi, maaliskuu 2010 nuvemperi 2013 Selitä lyhysti joka viran alla mitä työtehtäviä sulla on ollu. Esimerkki: Kauppa-apulaisena osalistuin kaupan kaikissa työtehtävissä. Suunittelin ostoksia, nostin tavaroita paikalle ja seisoin kassassa. Mie autoin kans markkinointissa. KOULUTUS Koulutuksen nimi, koulun nimi, esimerkiks Yritysekonomi Stokholmin yliopistossa Kaupunki, aikakausi, esimerkiks Stokholmi, Kuvvaa lyhysti joka opetuksen sisälön. Esimerkki: Mie luin kaks terminaa yrityksenekonomia, kaikkians 60 p. Olen hyvin kiinostunu ainheesta, olletikki orkanisajuunista ja markkinoinista. KIELIÄ Tässä kirjotat mitä kieliä puhut. Esimerkki: Ruotti: äidinkieli, engelska: sujuvaa, franska: hyvä taito REFERENSIÄ Tässä kirjotat sinun kontaktitiot sinun referensile. Sie saatat kans kirjottaa Jätethään mielelhään kysynthään jos haluat jättää tietoja myöhemin.

12 Näin kirjotat henkilökohtasen preivin SARA ÖBERG Roslagsgatan Stockholm sara.oberg@mail.com linkedin.com/saraoberg Alota henkilökohtasen preivin otsikolla joka vettää lukijaa. Esimerkki: Muotista kiinostunu markkinointin kehittäjä haluaa tulla teän uueksi kauppapomoksi Henkilökohtanen preivi on aina etheenpäin kattova ja sinun maholisuus näyttää ette sie olet oikea henkilö virkhaan. Kirjota aina uusi henkilökohtanen preivi joka työpaikale mitä haet ja nosta esile eri asiat riippuen mitä työtä haet. Ajattele ette pittää olla balansi sinun cv:n ja preivin kans ettet selitä sammaa liian useasti. Jos haet työn anonsin kautta saatat ajatella ette peilata anonsia sillä tavala ette saat mukhaan sitä mitä työnantaja kyselee. Tehe researchiä. Sillon työnantaja tuntee ette sie olet lukenu asiasta ja olet kiinostunu. Nosta esile se komppetensi mikä sulla on ja mitä sie saatat lisätä. Varo tulemasta liian viraliseksi ja ylentäväks tekstissä. Sie et tartte esimerkiks alottaa preiviä Tällä kirjeellä haen virkaa mutta saatat sen eestä alkaa selittämällä miksi sie haet työtä ja miksi sie piät ette työnantaja pittää työlistää sinun. Työnantaja haluaa tietää kuka sie olet. Sen eestä kun mainita sinun ominaisuuet (esimerkiks ilonen, fleksiibeli ja vastuulinen) sie saatat ajatella jos sie saatat antaa konkreetin esimerkin tilantheesta missä olet ollu mukana missä sinun ominaisuuet tulevat näköselle. Useasti muistethaan esimerkin pitemphään kun jos vain mainittee ominaisuuet. Preivin lopussa sie saatat mielelhään kirjottaa jotaki privaattia sinusta ittestä. Esimerkiks mitä tykkäät tehhä vapa-aijala eli jos sulla on erikoisia harrastuksia. Ystävälisiä terhveisiä Sara Öberg Ps. Käytä mielelhään sammaa fonttia eli mallia sinun cv:ssä ja henkilökohtasessa preivissä. Sillä tavala näkkee ette net kuuluvat yhteen.

13 Mitäs kaikki sanat merkittevät Kaikila aloila on heän oma ammattikieli, niin meiläki. Tässä tullee sanalista tavalisimista käsitheistä/sanoista joita saatat kohata kun haet töitä ja olet yhtheyessä meihin Työvälitystoimistossa. Aktiivisuusraportti on selvitys niistä töistä mitä sie olet hakenu ja muut aktiviteetit mitä olet tehny tietyn aikakauen aikana jokka koskevat sinun pyrkimyksiä saa työn. Tarkotus on ette sie ja Työvälitystoimisto saavat yhtenhäisen kuvan siittä mitä tehet ja ette se parantaa sinun maholisuuksia saa työn. Työsuhesopimus kuvvaa mitä työsuhtheele jällaa, esimerkiksi palkka, työaika ja työvaatheet. Työsuhetotistus sisältää tietoja työ-suhtheen muoosta, aikakauesta, palkasta ja työtehtävistä. Työsuhemuoto on jyriitinen kuvvaus siittä minkälainen työsuhe työnantajan ja työntekijän välilä on. Esimerkkiä työsuhemuoista: työ toistaseksi, tietyn aijan työ, koetyö, projektityö ja tiima-työsuhe. Hakemus lähätethään työnantajille jokka ilmottavat vaphaista työpaikoista. Hakemuksessa pittää olla henkilökohtanen preivi eli saattopreivi (följebrev), ja cv eli meriittilista. Joskus kans kopiat intyykistä ja totistuksista. Hakemuspreivi, katto Henkilökohtanen preivi. Määräys on kehotus, useasti kirjotettu, meiltä Työvälitystoimistossa siittä ette sinun pittää hakea tiettyä vaphaana olevaa työtä, jonka met arvostelema sulle sopivaksi. Se on tärkeää ette sie otat yhtheyen Työvälitystoimiston kans jos sie et meinaa hakea sitä työtä. Jos sulla ei ole hyväksyttäviä syitä olla hakematta sitä työtä, se saattaa vaikuttaa sinun oikeutheen saa työttömyyskorvausta. Totistus/petyynki on dokymentti jossa on tietoja siittä kelle työnantajalle sie olet ollu töissä eli missä koulutuksessa sie olet ollu matkassa. Siinä on tietoja siittä kunka kauon se työ eli koulutus kesti, ja arvosanat (vitsord) ja arviointi sinun insatsista eli koulutustuloksista. Liitheet on net asiapaperit jokka liitethään hakemuksheen. Net saattavat olla arvosanoja, työpruuvia, ammattitotistuksia ja muuta. Cv merkittee curriculum vitae. Se on latinaa ja tarkottaa elämänkertakuvvaus. Cv on tarkka kuvvaus meriitistä ja kokemuksista. Cv-tietokanta on palvelu eli kohtauspaikka intternetissä jossa sie saatat esitellä ittesti ja sinun komppetensin. Sie rejistreeraat omat tiot blankethiin joka säilytethään tietokannassa. Sieltä työnantajat saattavat hakea henkilöitä joila on oikea komppetensi jollekki vaphaale työpaikale.

14 Eures on ennen kaikkia EU/EES:in ja Schweizin julkisitten työvälitystoimistoitten verkosto. Eures on lyhenys tästä: European Employment Services. Saattopreivi on lyhempi henkilökohtanen preivi jonka on hyvä liittää laajan cv:n kuvauksheen. Toimintasuunitelma. Sie joka olet kirjotettu sisäle Työvälitystoimisthoon otat yhessä työnvälittäjän kans framile toimintasuunitelman sinun työhakemisesta varten. Toimintasuunitelmassa on mitä sinun pittää tehhä ette löytää työn. Intressi-ilmotus/esittelypreivi on enämpi ylheinen preivi, jota käytethään cv-tietokannoissa. Sen saattaa kans lähättää työnantajille jokka ei ole anonseeranheet töistä. Siinä sie esität ittesti ja kirjotat mistä töistä olet kiinostunu. Intyyki/totistus on lyhy tieto siittä mikä työnantaja sulla on ollu eli mihin koulutuksheen sie olet osalistunu, ja millä aikakauela. Komppetensi on laaja käsite missä on monta merkityksiä. Tässä on kaks esimerkkiä: 1. Se koskee taitoa ja pätevyyttä, eli se mittaa henkilön tietoja, kykyjä, kelpoisuutta ja kapasiteettiä ratkasta tehtäviä. 2. Kykyä ja halua suorittaa joku tehtävä käyttämällä tietoja ja taitoja. Asiakastyöpaikka on asiakhaan taatturi Työvälitystoimistossa eli sen ulkopuolela, mitä sie saatat käyttää ko haet töitä. Meriitit on net tiot ja kokemukset jokka sie mainittet ko haet töitä. Net jaethaan ussein näin: muut kokemukset, esimerkiksi intressit, kielitaito ja yhistystyöt. viraliset meriitit, esimerkiksi koulutus ja työ Meriittilista on lista johonka olet koonu sinun meriitit, eli koulutukset joita sulla on, työt jokka sulla on olheet ja muita kokemuksia jokka saattavat kiinostaa työnantajaa. Meriittilista on useasti lyhempi ko sinun cv. Henkilökohtanen preivi eli hakemuspreivi on teksti sinusta ittestä. Siinä sie kirjotat miksi olet kiinostunu siittä työstä jota haet ja miksi sie olet sopiva työhön. Se lähätethään yhessä sinun cv:n eli sinun meriittilistan kans ko sie haet työtä joka on anonseerattu eli ko käänyt jonku erikoisen yrityksen puohleen. Paikka-pankko on tietokanta jossa on vaphaita töitä jokka on ilmotettu Työvälitystoimisthoon. Sie löyät Paikka-pankon osotheesta arbetsformedlingen.se. Sieltä saatat löytää töitä niin Ruottissa kun muissa maissa. Paikkaehotus on ehotus vaphaasta työstä mitä met Työvälitystoimistossa haluama tipsata sulle.

15 Tillaus on fynksjuuni Paikkapankossa. Sie saatat esimerkiks saa vastatulheet anonsit lähätettyä sinun e- posti osotheesheen. Ohjelma eli työmarkkinapuliittinen ohjelma on insatsi (eli niin sanottu toihmeenpano/åtgärd) joka tehhään siksi ette parantaa ihmisitten maholisuuksia saa töitä. Se mitä ohjelmia on olemassa, riippuu puliittisista päätöksistä ja vaihtelee. Projektityösuhe on aikarajotettu työsuhe joka on liitetty tiethyin työtehtävhiin eli asihoin. Koetyösuhe on työsuhe joka jällaa toistaseksi mutta siinä on ensin kuuen kuukauen koeaika. Referensi on suulinen eli kirjalinen kuvvaus sinun kokemuksista ja siittä minkälainen sie olet henkilönä, ja jonka joku jonka sie tunnet antaa. Referensihenkilö/referensi on henkilö, johon sie itte valittet refereerata, ja joka saattaa selittää mitenkä sie toimit kun tehet töitä eli opiskelet. Se saattaa kans olla henkilö joka tuntee sinun hyvin. Testiä käytethään joskus ja sillä annethaan perustaa työnantajalle ette työlistää oikea henkilö. Toistaseksi voimassa oleva työsuhe kuttuthaan joskus vakituiseks työksi ja se tarkottaa ette sitä työsopimusta ei ole aikarajotettu. Tiima työsuhe essiintyy kun on kyse osa-aikatyöstä eli kun työaika ei ole säänölinen. Palkka maksethaan tiimaa kohti. Verifieeraus sinun totistuksista ja intyykistä tehhään sillon kun sie näytät net paikalisessa Työvälitystoimistossa. Sen met tehemä sen takia ette varmistaa ette tiot sinusta on oikeat ja ette saatama sovittaa sinun sopivitten töitten kans. Totistaa oikeaksi tarkottaa ette vähhiinthään kaks henkilöä, omila nimenkirjotuksila ja telefuuninumeroila/osotheila, totistavat ette sinun kopiat on sopusoinnissa alkuperäsitten/orkinaalitten kans. Vikariaatti on aikarajotettu työsuhe jossa se joka saapi työn korvaa sen joka siinä tavalisesti on töissä. Vissinaijan työsuhe on aikarajotettu työsuhe, katto kans Projektityösuhe ja Vikariaatti.

16 Palvelu telefuunin kautta Soita ja puhu yhen työnvälittäjän kans. Auki arkisin 8-20 ja lauantaina ja pyhänä Vieraile arbetsformedlingen.se Hae inspirasjuunia ja apua Ruottin suuriimasta työsaitista. Kontaktaa lähimäistä työvälitystoimistoa Osotheen löyät meän veppipaikalta Kohtaa meitä Facebookissa facebook.com/arbetsformedlingen