Sulle, joka halvaat tietää enämpi inkontinenttiasta eli piätyksen heikkouesta
Text: Inkontinenscentrum i Västra Götaland Foto: Kajsa Lundberg Layout: Svensk Information
Oonkos sulla vaikea pysyä kuivana? Karkaakos sulla pissa houshuin? Vuotaakos sulla pissa omia aikoihjaan? Kärsitkös sie piätyksen heikkouesta eli inkontinenttiasta? Sen saattaa sanoa monela laila. Pissan eli kaakan piätysprupleemi oon semmonen kiusa, ette siittä oon piiaan vaikea vaphaasti praatata, mutta soon kuiteski kiusana niin ylheinen, ette sitä piethään aivan kansanterhveysprupleemina. Tällä lehtisellä met halvaama kääntyä Sinun puohleesti, jolla ittelä saattaa olla näitten hoijotten kanssa prupleemia, taikka sie saatat pian tuntea jonku, jolla niitä prupleemia oon eli sie vain varsin halvaat tietää enämpi tästä inkontinenttia - hommasta. 3
Mitäs se inkontinenttia sitte meinaa? Pissa- ja kaakkainkontinenttialla meinathaan semmosta pissan eli kaakan varkhain löysäämistä, ette siittä oon tullu prupleemi. Meilä Ruottissaki yli puoli miljoonaa kärsii jonku sortin inkontinenttiasta; nuoret ja vanhaat, vaimot ja miehet, kasuavat kläpit ja jo nuoruutheensa tulheet saattava kaikin tämän kiusan saaja. Iän myötä tämä prupleemi tahtoo niin vaimoila ko miehiläki vain lissäytyä. Aina sunkhaan ole siittä kyse, ette karkaamisen määrä elikkä sen tihheys olisit merkittävät. Se oon enämpiki kyse hankalasta olosta ja heikentynheestä elämän kvaliteetista, jokka tähhään kiushaan niin helposta liittyvä. Tämän karkaamistouhunki kokkee itte kuki laihlaan. Muutama tippa pöksyissä saattaa yhele olla yhtä tyhjän kanssa, mutta toisele se saattaa olla katastrooffi. Näin se mennee. Meitä ei ole kahta samanlaista. 4
Se oon itteshään aivan tavalista, ette häätyy useasti käyä tualetissä Raahvaan miehen eli vaimon pissarakko vettää siinä 5 7 dl ja ko sielä oon pissaa 2,5 3 dl sitä alkaa tuntea tarvetta päästä tyhjentämhään rakkonsa. Pissaa muo ostuu ittelä kullaki vuorokauessa siinä 1 2 litraa ja soon aivan normaalia, ette sitä häätyy käyä pissala 4 8 kertaa päivässä. Sitä periaatheessa häätys kyetä itten kunki piättämhään pissaa isomitta vaikeuksitta ainaski 3 4 tiimaa. Siihen kunka useasti sitä häätyy käyä tualetissa, vaikuttaa tietenki sen nestheen määrä, mitä oon tullu otettua. Toisitten häätyy yöläki käyä tualetissa olletikki, jos oon tullu juotua hiljain illala. 5
Inkontinenttiaa oon monta sorttia l Stressi- eli rasitusinkontinenttiasta Pissa saattaa karata ko ponnistaa, rykkii, niistää nokkaa, nauraa elikkä siittä ko nostaa jotaki raskhaampaa. Tällön puhuthaan stressi- eli rasitusinkontinenttiasta. Tämmönen pissan löysäily oon varsiin tavalista vaimoila, joila se saattaa ensimäisen kerran tulla raskhauven ja synnytyksen jälkheen elikkä klimakteerin ja vaihevuositten aikana. Karkailun takana oon vattanpohjan lihasten heikkous niin, ette net antava huonosti tukea pissarakole ja pissaröörile. Liika paino, taipumus ummetuksheen kaakkahommissa tai kruuninen yskä saattava lastata netki liikaa mahanpohjan myskeliä, mikä puolesta pahentaa pissan karkauskiusaa. Lisäksi toisila saattaa olla perinöllistäki taipumusta pissan karkaihluun ja vissit tropit netki saattava olla tilanetta heikentämässä. Joissaki kylttyyrissa tympathaan vaimoilta sukupuolielimiä ja nämät vaimot saattava piiaanaikaa saaja toisile prupleemia rakon tyhjentämisessä ja toisile sen, ette heilä pissa alkaa varkhain karkaahmaan. Osala vaimoista saattaa naimisen taikka orgasmin yhtheyvessä löysätä vähän pissaa. Siinä mithään. Se ole sunkhaan epänormaalia, mutta ilkeännä sen saattaa silti kokea. l Pissarakko oon yliaktiivinen Jos pissarakko oon yliaktiivinen jostaki syystä, niin sitä saattaa tuntea semmosta äkilistä pakottavvaa pissaamisen tarvetta ja pölätä housuittenki kastuvan. Tämän sorttisheen kiushaan liittyy lähes aina voimakas pissahopun (kusihopun) tunne, missä sunkhaan aina kykene karkailuakhaan toppaahmaan. 6 Saattaapa koko rakkoki aivan tahtomatta tyhjentyä houshuin, jos sitei kerkiä tualethiin.
Tämmösseen pissahophuun saattaa olla syy joko pissarakossa eli sen ulkopuolela: pissateissä saattaa olla tulethusta (inflammasuunia), hormoonibalansissa jotaki muutosta elikkä ette tulethus ja sen ärsytys oonki pissaröörin limakalvotten (slemhinnoitten) aluheela. Pissarakon lihasten hermostollinen kooperaatio saattaa olla häiriintynnyttä ja siittä seuraa prupleemia pissarakon toiminalle ja pissan tahatonta karkailua. Miehilä tavalinen eturauhasen (prostaatan) liikakasvu saattaa haitata pissarakon kunnolista tyhjentymistä ja vaikuttaa siihen, ette häätyy kusta useamasti ja ette pissa karkailee. Toisinhaan yliaktiivisen rakon taustalta saattaa löytyä muitaki saihrauksia tai kasvhuun ja käyttäytymisseen liittyviä (sykolookisia) tekiöitä. l Sekainkontinenttiasta Puhuthaan semmosesta ko sekainkontinenttiasta, jollonka potilhaala oon toettavissa oiretta molempien kahen eelä mainitun tyypin aluheelta. l Ylivuotoinkontinenttiassa Ylivuotoinkontinenttiassa oon kyse pissarakon liiasta täyttymisestä ja sen aiheuttamasta tyhjentymisen vaikeutumisesta ko rakosta lähtevä pissarööri oon painunu lithuun. Vuotoa tihkuttaa ko pissarakon sulkialihas (kiinipanomyskeli) ei ennää pysty panheen vasthaan pissarakon kohohneele paihneele. Miehilä eturauhasen (prostaatan) suurentuminen ja pissaröörin ahtaus saattava aiheuttaa paitti pissasuihkun heikentymistä myös pissaamisen jälkheistä tiputtelua ja yölistä karkailua. Sokkeritautia sairastavila saattaa olla yölistä ylivuotoinkontinentiaa pissarakon suurten neste tähen. l Kaakan kanssa inkontinenttiaa Kaakan kanssa sitä saattaa olla inkontinenttiaa niin ette kaakkaa saattaa valua tuhrivana kiusana aivan varkhain. Tämmösiä tilantheita voipii syntyä synnytysvaurion jälkheen, ummetuksen yhtheyvessä, tihentynheitten kaakkaamisen tarpheitten johosta ja kaakan löysyyven kanssa ja kans erilaisten vammotten ja neurolookisten saihrauksitten yhtheyvessä. 7
Sitä vain saattaa itteki tehjä paljon Se oon tietenki ittesthään selvä, ette jokhaisen tullee saaja pissata ko pissahoppu sauttaa. Hyvät keinot oon kuiteski tarpheen, jos oon näissä hoijoissa prupleemia. Ko sulla tullee pissahoppu ja sie menet tualethiin, niin ota silloon rauhalisesti. Istu mukavasti ja noijaa reishiisti. Ja ko sie et ole koko aikaa pyyrölhään pissan tulosta niin kyllä se sieltä tullee. Istu menheen niin kauan tualettitoolila ko tunnet rakkosti tyhjentynheen. Ja yhtä tärkeätä se oon pittää vaarin säänölisestä kaakanki tulosta. Hunteeraa sitäki, ette kunka paljon sie juot. Katto perhään, ette juomista varsiinki kahvi, tee ja ööli lissäävä pissan tuloa. Heelmissä ja vihaneksissa oon kans paljo vätskaa. Ja olletikki ehtoopuolela sie hääyt pittää vaarin, ettet sie juo liikaa. Jos sinun rakkosti tyhjenee yli kaheksan kertaa päivässä elikkä sinun pissahoppusti oon sen verran paha, ettet kerkiä ajoissa tualethiin niin sie saatat saaja apua rakon skuulaamisesta. Ei se skuulaaminen ole muuta ko, ette siinä vasitusti freistathaan pientää tualetissa käynnitten väliä. Sie saatat joutua seuraahmaan sinun pissamääriä ja sitä kunka paljo sie juot päivän mithaan ja mitä juot. 8
Mitäs sitte hoijoksi? Rasitusinkontinenttiassa, joka tullee olletikkii ponnistaessa, tärkheimpänä hoitona oon pissarakon ja pissaröörin ympärilä olevien vattanpohjan lihasten träänaus. Suuriin osa vaimotten tämän sortin inkontinenttiasta hoituuki tällä. Vaimot, jokka oon klimakteerissa saattava saaja avun inkontinenttiihaan pissaröörin seuvun paikallisesta estrokeeniterapiasta vallatikki silloon ko siihen panhaan fölhjyyn vattanpohjan lihasten (myskelitten) träänaus. Jos tässä ei lykästytä, sillon saattaa olla eessä leikko. Yliaktiivisessa rakossa, joko inkontinenttian kans tai ilman, hoitona oon rakon träänaus, käyttäytymisterapia (BT), päivittäinen nestheen oton vähentäminen ja lääkehoito, millä rauhotethaan ylivilkasta rakkoa. Sähköhoitoa (stimulaatio) ja akupunktuuriaki saatethaan käyttää. Tulethuksen maholisuus oon syytä seki selvittää. Jos oon kyse sekainkontinenttiasta, missä oon niin rasitus ko yliaktiivisuus inkontinenttiat följyssä, hoito alotethaan vaikeaman symptoomityypin jälkhiin. Miehitten proostata suurentumhaan ja sen aiheuttamhaan inkontinenttiihaan hoitona käytethää troppia, mikroaaltoterapiiaa ja leikkoa. Leikonki jälkhiin oon useasti eessä sama vattanpohjalihasten träänaus ko vaimoilaki. Kaakan piätyksen häiriössä oon siinäki sama vattanpohjalihasten träänaus paikalhaan. Yhtä tärkeätä, ko oon suoliston toimintaa rekuleeraavat tropit ja lavemangit, oon se, ette syöpi oikeanlaista sapuskaa ja muistaa pittää vaarin riittävästä liikkumisesta. Jos sie eppäilet sinun troppiesti pahentavan sinun pissa elikkä kaakkahommia niin nosta asia framile sinun lääkäristi kans. 9
Mistäs mie sitte saan apua ko tartten? Uroterapeutti, systeri ja paanmuska sinun omassa hälsosentraalissa oon semmoset, joihiin oon hyä ottaa kontakti näissä prpleemissa. Net saattava jo villin hyvin jelpata sinua ja viisaava sinut kyllä tarvittaessa etheenki käsin joko lääkärille eli siukkajymnastikhiin. Oon tietysti aivan selvää, ette sitä aina häätyy enstheeksi saaja inkonttinenttian syy selvile ennen ko lähethään hoitamhaan. 10
Sitä oon monia hyviä keinoja klaarata tämän kans Keinoja löytyy niin tutkimuksen ko hoijonki puolelta. Hyviä apuvälihneitäki oon, jokka jelppaava inkonttinenttiasta kärsivän arkea. Apuvälihneitä tarvithaan niin ennen hoitoa ja joskus hoijon jälistäki, jos hoito ei ole pelanukhaan niinku ootethiin. Joskus potilhaan ylheinen vointi oon sen verran heiko, ette hälle saatetakhaan alottaa jotaki vaativaa hoitoa. Silloon turvau uthaan apuvälihneissiin. Sinun oon hyä tietää, ette jos sulle alotehaan joku hoito elikkä annethaan joku apuväline inkonttinenttiihaan, siihen kuuluu kans, ette kattothaan perhään kunka se pellaa ja ette se pellaa niin hyvin ko maholista. 11