Siukkakorvaus (Sjukersättning) Sie saatat saa siukkakorvausta jos sinun työkyky pysyvästi oon heikentynny vähhiinthään neljäsosala. Ennenkö saapi siukkakorvausta, kaikki työkykymaholisuuet häätyvä ollla pruuatut. Siukkakorvaus saattaa perustua tulhoin eli olla garanteerattu korvaus. 1 jyyli-/heinäkuuta 2008 lähtien jällaava uuet säänöt siukkakorvauksele. Ei ennää ole maholista saa aikarajotettua siukkakorvausta 1 jyyli-/heinäkuuta 2008 lähtien. Jos sulla jo ennesthään oon aikarajotettu siukkakorvaus, sulle saattava jällata siirtymis-säänöt (övergångsbestämmelser), joka tarkottaa ette vanhemat säänöt saattava jällata vuen 2012 lophuun. Kuka saattaa saa siukkakorvausta? (Vem kan få sjukersättning?) Sie saatat saa siukkakorvausta jos sie olet 30 64 vuotias och ja sinun työkyky oon rajotettu vähhiinthään neljäsosala siukkuuen eli sinun fyysinen eli psyykkinen toimintakyky (prestationsförmåga) muuten oon heikentynny. Ennenkö sie saatat saa siukkarahhaa, sinun työkyky häätyy olla pysyvästi rajotettu, eli niin pitkäksi aikaa ko saatethaan arvioia. Työkyvyttömyys häätyy jällata kaikkia ansiotöitä (förvärvsarbeten) työmarkkinoila ylheensä. Siihen kuuluva kans net työt jokka oornathaan henkilöile joila oon rajotettu kyky, esimerkiksi palkkatukityöt (lönebidragsanställningar). Paljonkos siukkakorvausta saapi? (Hur mycket får man i sjukersättning?) Täysi tulhoinperustuva (inkomstrelaterad) siukkakorvaus antaa sulle 64 prosenttia oletetusta tulosta (antagandeinkomst), se tulo jonka Siukkakassa räknää ette sulla uskottavasti olis ollu jos olisit pystyny jatkamhaan töitä. Jos sulla oon olhee pienet tulot, eli ei tuloja ollenkhaan, sie saatat saa garanttikorvauksen. Vuona 2008 sie saat korkeinthaan 98 400 kruunua (2,4 hintaperusmäärää/prisbasbelopp*) vuessa joka oon täysi garanttikorvaus. Sie saatat saa täyen, kolme neljäsossaa, puoli eli yhen neljäsosan siukkakorvausta. Kuinka paljon sie saat, riippuu siittä kuinka paljon sinun työkyky oon heikentynny ja sinun maholisuuksista elättää ittesti työlä. Niin tulhoinperustuva siukkakorvaus ko garanttikorvauski räknäthään uuesti janyaari-/tammikuussa joka vuosi ko hintaperusmäärä muuttuu. * Hintaperusmäärä seuraa yhtheiskunnan hintakehitystä. Vuele 2008 hintaperusmäärä oon 41 000 kruunua. Mitenkä siukkakorvausta saapi? (Hur går det till att få sjukersättning?) Sie saatat hakea sitä itte (Du kan ansöka själv) Sie saatat itte hakea siukkakorvausta. Sie käytät erityistä blankettia jonka saat Siukkakassasta eli osotheesta www.forsakringskassan.se. Sinun pittää kans panna matkhaan tohturin lausunto (läkarutlåtande).
Siukkakassa saattaa vaihtaa sinun siukkarahan siukkakorvauksheen (Försäkringskassan kan byta ut sjukpenning mot sjukersättning) Jos Siukkakassa arvioittee ette sie täytät vaatimukset saa siukkakorvausta, met saatama päättää ette vaihtama sinun siukkarahan siukkakorvauksheen. Siukkakassa oon koko ajan yhtheyessä sinhuun ja tohturhiin joka sinua hoitaa, ennenkö semmonen muutos tehhään. Mitenkä sinun oikeus saa siukkakorvausta arvioihaan? (Hur bedöms din rätt till sjukersättning?) Sie tarttet tohturin lausunon (Du behöver ett läkarutlåtande) Ko sie haet siukkakorvausta, sulla häätyy olla tohturin lausunto. Ensikäessä se oon se tohturi jonka tykönä sie normaalisti käyt, joka pittää kuvvailla sinun terhveyen tilantheen lausunossa. Mutta Siukkakassa saattaa vaatia ette joku muu tohturi eli asiantuntia syynää sinut ja arvioittee sinun maholisuuet tehä töitä. Siukkakassa selvittää sinun olosuhtheet (Försäkringskassan utreder dina förhållanden) Met selvitämmä niin sinun työolosuhtheet ko sosiaaliset olosuhtheet. Se tarkottaa ette met kysymä esimerkiksi perheolosuhtheista, lastenhoijosta, huushollityöstä, vapaa-ajan harrastuksista, koulutuksesta, sivutöistä eli tehtävistä (uppdrag) jokka saattava vaikuttaa sinun oikeutheen saa korvausta. Uusi työkykyselvitys joka kolmas vuosi (Ny utredning av arbetsförmågan vart tredje år) Sinun työkyky saattaa muuttua. Sillä aikaa ko sie saat siukkakorvausta jota ei ole määrätty vissile aikaa, Siukkakassa tulleeki tekehmään uuen selvityksen joka kolmas vuosi ette saama tietää onko sulla vieläki oikeus saa saman tason korvausta. Siukkakassa tullee kans selvittämhään onko mithään tapahtunnu joka oon parantannu maholisuuksia rehabiliteerata sinua. Siukkakassa tekkee jälkikontrollia (Försäkringskassan gör efterkontroller) Jos sulle oon myönetty siukkakorvaus ennen 1 päivä janyaari-/tammikuuta 2005, Siukkakassa tarpheen vaatiessa tekkee jälkikontrollia. Kontrollit tehhään siksi ette saa selvile onko sinun työkyky paranu, eli onko sinun maholisuuet rehabiliteerinkhiin parantunhee. Mitenkä rahat maksethaan ulos? (Hur betalas pengarna ut?) Siukkakorvaus maksethaan sille kontule jonka sie ilmotat Siukkakassale. Se maksethaan ulos 18 eli 19 pv joka kuukausi. Jos ulosmaksopäivä oon lauantai, sie saat siukkakorvauksen perjantaina. Jos ulosmaksopäivä oon pyhä, juhlapyhä eli juhanusaatto, sei saat korvauksen seuraavanna arkipäivänä. Jos asut ulkomaila, sinun siukkakorvaus lähätethään Ruottista ulosmaksopäivänä. Jos siukkakorvaus oon korkeinthaan 2 400 kruunua vuessa, sie saat sen jälkikätheen jyyni-/kesäkuussa ja joulukuussa joka vuosi. Summat yli 2 400 kruunua vuessa saatethaan kans maksaa ulos vain kahesti vuessa jos sie itte tehet siittä hakemuksen Siukkakassale. Ulosmakso kuolintaphauksessa (Utbetalning vid dödsfall) Omhaisilla oon oikeus saa ulos koko kuukauen siukkakorvaus vaikka kuolintaphaus olis sattunu jonaki kuukauen ensimäisistä päivistä. Mutta seuraavan kuukauen siukkakorvausta ei saata hakea ulos.
Lissää siukkakorvauksesta (Mer om sjukersättning) Sie voit pruuata olla töissä eli opiskella ja korvaus leppää (Du kan pröva att arbeta eller studera med vilande ersättning) Sillä aikaa ko sulla oon siukkakorvaus, sie saatat tehä töitä eli opiskella ilman ette sulta mennee oikeus korvauksheen. Sitä kuttuthaan leppääväksi siukkakorvaukseksi. Sie hääyt hakea leppäävää korvausta ennenkö alat töihin eli opiskelheen. Jos sie alat töihin, sie saatat kans hakea pruuiaikaa korkeinthaan kolmeksi kuukaueksi ko sulla oon palkka ja siukkakorvaus yhtä aikaa. Leppäävää siukkakorvausta saat varhaisinthaan silloin ko sulla oon ollu siukkakorvaus vuen. Korvaus saattaa levätä korkeinthaan kaks vuotta. Sie saatat tehä vähä töitä ja pittää koko siukkakorvauksen (Du kan arbeta lite med hel sjukersättning) Jos saat koko siukkakorvauksen, sulla oon kuitenki maholisuus käyttää hyväksi pientä jäljelä olevaa työkykyä ja esimerkiksi tehä aatheelista (ideellt) eli poliittista työtä. Se tarkottaa ette sie saatat tehä työtä tiiman päivässä ja tienata korkeinthaan yhen kaheksasosan normaalista kokopäivätulosta siinä hommassa mitä pystyt tekheen ja sulla oon kuitenki oikeus saa koko siukkakorvaus. Ota yhtheys Siukkakassan kans ja keskustele mitä sulla oon maholisuus tehä, ennenkö alat töihin. Jos sulla oon kolme neljäsossaa siukkakorvauksesta, saat apua työn hakemisessa (Med tre fjärdedels sjukersättning får du hjälp att hitta ett arbete) Jos sulla oon kolme neljäsossaa siukkakorvausta, Siukkakassa oon vastuussa siittä ette saat työn joka vastaa sinun jäljelä olevaa työkykyä. Työvälitys (Arbetsförmedlingen) pittää kuuen kuukauen sisäle saa sinut ordinaari työmarkkinoile, maholisesti palkkatuen (lönebidrag) avula. Jos se ei onnistu, sulle pittää tarjota työtä Samhall AB:lä. Mitä siukkarahale tapahtuu? (Vad händer med sjukpenningen?) Ko sulle oon myönetty koko siukkakorvaus, sulla ei ennää ole oikeutta saa siukkarahhaa. Jos sulle oon myönetty yks neljäsosa, puoli eli kolme neljäsossaa korvausta ja sulla oon työtuloja vähhiinthään 9 900 kruunua vuessa (24 % hintaperusmäärästä), sie saatethaan määrätä (fastställa) siukkarahhaa perustava tulo ja silloin sie saatat saa siukkarahan jos siukkuuen vuoksi et saata tehä töitä. Siukkakorvaus saattaa pienentyä jos sulla oon muita korvauksia (Sjukersättningen kan minska om du har andra ersättningar) Jos sie, yhtä aikaa ko saat siukkakorvausta, kans saat ulkomaalaista invaliidipansuunia eli muita ulkomaalaisia invaliidikorvauksia, niin net saattava pienentää siukkakorvausta. Jos asut ulkomaila eri siiryt ulkomaile (Om du bor eller flyttar utomlands) Tulhoin perustuvaa siukkakorvausta maksethaan ulos riippumatta siittä missä maassa sie asut. Garanttikorvausta et kuitenkhaan saa matkhaan ko EU/EES- maihiin, Schweiziin ja Kanadhaan. Kääny Siukkakassan puohleen, niin saat lissää tietoja siittä koska sulla oon oikeus saa matkhaan garanttikorvaus toisheen maahan. Jos siiryt ulkomaile pysyvästi, sie hääyt ilmottaa siittä Siukkakassale. Oon tärkeää ette sanot mihin osotheesheen, pankhoon ja konthuun sie halvat että siukkakorvaus lähätethään. Ennenkö sulla jatkuu oikeus saa siukkakorvausta, sie joka asut ulkomaila, hääyt lähättää niin sanotun elämisintyygin (levnadsintyg) Ruottin Siukkakassale kerran vuessa. Se tehhään näin: Saat auttomaattisesti blanketin Siukkakassasta. Täytä blanketti, ota matkhaan jällaava passi ja mene johonki niistä viranomhaisista eli vastaavista jokka oon listattu blanketissa. Sie hääyt toistaa (intyga) ette sinun tiot pitävä paikkansa. Lähätä sitte blanketti Siukkakassale.
Joissaki taphauksissa sie et saa intyygiblankettia. Juuri yt se jällaa sinua joka asut Suomessa, Norjassa eli Saksassa. Tiot sinusta saahan tioitten vaihtossa Ruottin ja sinun asumamaan välilä. Ko asut ulkomaila, saatat saa Erityisen tuloveron ulkomaila asuville ( Särskild inkomstskatt för utomlands bosatta ) (SINK). Ota yhtheys Verolaitoksen kans SINK-tioista. Tulhoin perustuva siukkakorvaus (Inkomstrelaterad sjukersättning) Tulhoin perustuva siukkakorvaus perustuu sinun aikasemphiin työtulhoin, mutta kans aikasemphiin korvaukshiin Siukkakassasta esimerkiksi siukkaraha ja vanhempainraha. Yksinkertasemin saattaa sanoa ette sulle räknäthään tulhoin perustuva siukkakorvaus jos: Sie olet töissä Ruottisssa silloin ko vakkuutustaphaus (försäkringsfall) tapahtuu. Vakkuutustaphaus oon silloin ko sie täytät vaatimukset saa siukkarahan. Sulla oon ollu pansuunia perustava tulo eli pansuunia perustava summa siukkakorvauksesta vähhiinthään vuen niin sanotun raamiajan (ramtid) aikana. Raamiaika oon vissi aika taka käsin räknätty vuesta ennen vakkuutustaphaus-vuotta. Jos sulla oon pansuunia perustava tulo, sie saat joka vuosi tion siittä (oransi kuertti/det oranga kuvertet). Oletettu tulo kolme parasta vuotta räknäthään (Antagandeinkomst de tre bästa åren räknas) Ko met räknäämä ulos sinun korvauksen, met ensin räknäämä sinun oletetun tulon. Se oon se tulo jonka met oletamma ette sulla olis ollu, jos olisit jatkanu töitä. Se räknäthään niin ette met otama raamiajan kolme parasta vuotta, eli net vuet ko sulla olit korkeimat tulot ja räknäämä niistä keskiarvotulon. Mikä raamiaika oon? (Vad är ramtid?) Raamiaika oon vissi aika takasi käsin räknätty vuesta ennen vakkuutustaphaus-vuotta. Sie saat räknätä hyväksi vain net tulot jokka sulla oon olhee raamiaikana, ko met räknäämä sinun korvauksen. Raamiaika oon viien ja kaheksan vuen välilä riippuen sinun iästä: Sinun ikä vakkuutustaphauksen vuona (försäkringsfallet) Raamiaika Täytät 53 vuotta eli olet vanhempi 5 vuotta Täytät 50, 51 eli 52 vuotta 6 vuotta Täytät 47, 48 li 49 vuotta 7 vuotta Täytät 46 år eli olet nuorempi 8 vuotta Minkä tuloitten perustheela se räknäthään? (Vilken inkomst används vid beräkningen?) Ko räknäämä oletettua tuloa, met lähemä sinun bruttovuositulosta jonka sitte räknäämä uuesti nykysen raha-arvon mukhaan. Sinun bruttovuositulo oon sinun pansuunia perustava tulo ja siihen net pansuunimaksot jokka Verolaitos oon vetäny. Pansuunia perustava tulo oon se tulo josta saat tion oransissa kuertissa joka vuosi. Saat framile bruttovuositulon jakamalla pansuunia perustavan tulon 0,93:la.
Et kuitenkhaan saa räknätä matkhaan vaikka kuinka korkeita tuloja. Jos sulla oon tuloja yli 307 500 kruunua (7,5 hintaperusmäärää), niitä ei räknätä matkhaan. Oikeus saa tulhoin perustuvan pansuunin tulevaisuuessa (Rätt till framtida inkomstgrundad pension) Tulhoin perustuva korvaus antaa sulle oikeuen saa tulhoinperustuvan ikäpansuunin tulevaisuuessa. Jos sulla oon koko siukkakorvaus, saat pansuunioikeutta 80 prosenttia sinun oletetusta tulosta; se tulo jonka Siukkakassa räknää ette sulla olis ollu, jos olisit ollu töissä. Garanttikorvaus (Garantiersättning) Jos sulla ei ole ollu tuloja, saatat saa siukkakorvauksen garanttikorvauksena. Saatat kans saa garanttikorvauksen, jos sulla oon matala tulhoin perustuva korvaus. Siinä taphauksessa garanttikorvaus oon yhtä iso ko sinun tulhoin perustuvan korvauksen ja garanttitason ero. Yksinkertasesti sanottu, sulla oon oikeus saa garanteerattu korvaus jos: Asuit Ruottissa silloin ko vakkuutustaphaus tapahtu. Vakkuutustaphaus oon silloin ko täytät vaatimukset oikeutheen saa siukkakorvausta. Sulla oon vähhiinthään kolmen vuen vakkuutusaika Ruottissa. Vakkuutusaika räknäthään sen mukhaan kuinka kauon olet asunu Ruottissa. Katto ossaa Mikä vakkuutusaika oon? Korkein garanteerattu taso oon 98 400 kruunua vuessa (2,4 hintaperusmäärää). Jos olet asunu Ruottissa koko elämän, saat korkeiman tason korvauksen. Jos et ole aina asunu Ruottissa, korvausta saatethaan pienentää. Se riippuu siittä kuinka pitkä vakkuutusaika sulla oon. Jos se oon lyhempi ko 40 vuotta, korvaus pienenee 1/40 joka vuele joka sulla puuttuu. Mutta se ei tarkota ette sinun oon häätyny asua Ruottissa 40 vuotta ennenkö för saat korkeiman tason korvauksen. Sulla saattaa olle 40 vuen vakkuutusaika ilman ette olet asunu Ruottissa 40 vuotta. Mikä vakkuutusaika oon? (Vad är försäkringstid?) Saat räknätä hyväksi vakkuutusaikaa siltä ajalta ko olet asunu Ruottissa. Sitä kuttuthaan toeliseksi vakkuutusajaksi. Mutta saat kans räknätä hyväksi vakkuutusaikaa siltä ajalta ko arvioittet asuvan Ruottissa. Sitä kuttuthaan tulevaksi vakkuutusajaksi. Siukkakorvaus garanttikorvauksena perustuu niin toelisheen ko tulehvaan vakkuutusaikhaan. Toelista vakkuutusaikaa saat ajalta ko olet asunu Ruottissa siittä vuesta lähtien ko täytit 16 ja vuotheen ennen vakkuutustaphaus-vuotta saakka. Tulevaa vakkuutusaikaa vakkuutustaphaus-vuesta lähtien saat siihen saakka ko täytät 64. Mutta sinun tuleva vakkuutusaika riippuu kans siittä kuinka kauon olet asunu Ruottissa. Ennenkö saat räknätä hyväksi tulevaa vakkuutusaikaa kaikilta vuosilta vakkuutustaphaus-veuesta siihen vuotheen ko täytät 64, sinun oon häätyny asua Ruottissa vähhiinthään 80 prosenttia ajasta siittä lähtien ko täytit 16 vuetheen ennen vakkuutustaphaus-vuotta. Pakolaisile ja muile turvaatartteville jällaava erityiset säänöt, jokka tekevä ette het saattavat saa räknätä sen ajan ko oon asuhnee entisessä kotimaassa toeliseksi vakkuutusajaksi. Jos vakkuutustaphaus tapahtu ennen ko täytit 18 vuotta, vakkuutusaika saatethaan räknätä erityisitten säänöitten mukhaan. Sie et ole tarvinu olla vakkuutettu silloin ko vakkuutustaphaus oli ja sie voit saa räknätä vakkuuutusajaksi koko ajan siittä vuesta lähtien ko täytit 16 ja siihen vuotheen ko täytät 64. Sitä aikaa ko et ole asunu Ruottissa et kuitenkhaan saa räknätä vakkuutusajaksi. Jos olet jonku maan kansalainen joka oon EU/EES-aluheen ulkopuolela, sie olet häätyny asua Ruottissa vähhiinthään viis vuotta ennenkö sinun vakkuutusaika räknäthään näitten säänöitten mukhaan. Esimerkki 1 vakkuutusaika (Exempel 1 försäkringstid) Hansi on 40 vuotta vakkuutustaphaus-vuona ja oon asunu Ruottissa 20 vuotta. Hansi saapi räknätä kaikki 25 vuotta vakkuutustaphauksesta siihen vuotheen saakka ko täyttää 64, ko tulevaa vakkuutusaikaa räknäthään. Se johtuu siittä
ette hän oon asunu Ruottissa vähhiinthään 80 prosenttia 16 ikä-vuen ja vakkuutustaphaus-vuen välilä (0,80 x 24 vuotta = 19,2 vuotta). Hansi saapi yhtheensä 45 vuotta vakkuutusaikaa Ruottissa. Esimerkki 2 tulhoin perustuva korvaus ja garanttikorvaus (Exempel 2 inkomstrelaterad ersättning och garantiersättning) Karin saapi koko siukkakorvauksen vuona 2008 ko hän oon 37 vuotta. Karin oon asunu Ruottissa koko elämän ja sen tähen hällä oon oikeus saa koko garanttikorvauksen. Hintaperusmäärä vuona 2008 oon 41 000 kruunua. Karinin garanteerattu taso oon silloin 2,4 x 41 000 kr = 98 400 kruunua. Karinilla oon ollu työtuloja ja ensikäessä hän saapiki tulhoin perustuvan siukkakorvauksen. Siukkakassa räknää ette hänen tulhoin perustuva siukkakorvaus oon 63 000 kruunua vuessa. Tämä tarkottaa ette hän kans saapi garanttikorvausta ette pääsee garanteeratulle tasole, 98 400 kruunua. Karinin korvaus tullee olehmaan tämä: Tulhoin perustuva korvaus vuessa garanttikorvaus vuessa Siukkakorvaus yhtheensä vuessa 63 000 kr + 35 400 kr = 98 400 kr Net 35 400 kruunua jokka Karin saapi garanttikorvausta kompleteerava hänen tulhoin perustuvan korvauksen ette hän saapi garanteeratun tason. Siukkakorvaus ja vero (Sjukersättning och skatt) Sie maksat veroa siukkakorvauksesta. Siukkakassa vettää veron. Jos sulle oon muita tuloja, net saattava vaikuttaa verhoon. Sen takia sinun pitäski ilmottaa jos sulla oon muita verotettavia tuloja muualta ko Siukkakassasta, esimerkiksi työtuloja. Sie et tartte lähättää verokuittia Siukkakassale. Siukkakassa saapi tiot suohraan Verolaitokselta. Jos halvat ette Siukkakassa vettää vähempi veroa (jos sulla esimerkiksi oon suuret ränttymenot) sie saatat hakea jämkninkiä sinun verokontturista. Lähätä sitte se päätös jonka sieltä saat, Siukkakassale. Jos halvat ette sinun siukkakorvauksesta veethään enämpi veroa, kääny Siukkakassan puohleen niin verovähenystä nostethaan. Korkeampaa veroa veethään sitte niin kauon ko itte et muuta ilmota. Sie saat joka vuosi janyaari-/tammikuussa kontrollition Siukkakassasta. Siinä oon kuinka paljon siukkakorvausta olet saanu ja paljonko veroa oon veetty. Jos korvaus maksethaan jolleki kontule, sie saat kontrollition samala ko saat tion janyaari-/tammikuun maksosta. Ota yhtheys Siukkakassan kans, jos et saa kontrollitietoa. Enämpi tietoa siukkakorvauksesta ja verosta, saat soittamalla verokontturhiin eli ostheesta www.skatteverket.se. Ilmota muutoksista (Anmäl förändringar) Sie hääyt ilmottaa kaikki muutokset, jokka saattava vaikuttaa sinun oikeutheen saa korvausta eli siihen kuinka suuri sinun korvaus oon. Se jällaa esimerkiksi jos alat töihin eli opiskelehmaan alat tekheen enämpi töitä ko ennen, jos esimerkiksi saat puoli korvausta mutta alatki kokopäivätyöhön jatkat töitä sen jälkhiin ko päätös leppäävästä siukkakorvauksesta oon menny ulos sinun työkyky oon parantunnu, vaikka et olekhaan töissä saat uuen ulkomaalaisen pansuunin, elinkoron (livränta) eli vastaavan, eli semmonen muuttuu sie siiryt ulkomaile. Jos sie et ilmota muutoksista, sinun korvaus saatethaan laskea eli vettää sisäle kokohnaan. Sie saatat kans joutua maksamhaan takasi, jos olet ottanu vasthaan liikaa rahhaa eli saanu rahhaa johon sulla ei ole oikeutta.
Muita korvauksia (Andra ersättningar) Sopimukshiin perustuvat vakkuutukset (Avtalsförsäkringar) Ko sie saat siukkakorvausta, sie piiain kans saat korvausta kolektiivisesti sovitusta vakkuutuksesta. Sen tähen sinun pitäs kysyä viimiseltä työnantajalta eli fakilta onko semmosta vakkuutusta ja mikä sulle siinä taphauksessa jällaa. Jos sulla oon ollu muita työnantajia, sinun pitäs kysyä niiltäki. Siukkakassa ei hoija kolektiivisesti sovittuja vakkuutuksia ja sen tähen emmä saata vastata kysymykshiin niistä. Asuntolisä (Bostadstillägg) Sie jolla oon siukkakorvaus, saatat saa asuntolissää. Sie haet asuntolissää Siukkakassasta. Katto faktaplaavia Asuntolisä sulle jolla oon aktiviteettikorvaus eli siukkakorvaus ( Bostadstillägg till dig som har aktivitetsersättning eller sjukersättning, jonka saat Siukkakassasta eli osotheesta www.forsakringskassan.se. Jos sulla oon kysymyksiä, saatat soittaa meän asiakaspalvelhuun (kundcenter) 0771-524 524. Faktaplaavi ei ole lakitekstiä. Siukkakassa kollaa Siukkakassa kollaa net tiot jokka sie jätät. Net saattava jällata tuloja, poissa-oloa töistä, siviili-tilanetta eli missä sie asut. Met vaihtama tietoja muitten viranomhaisitten kans ja käytämä meän rekisteriä rinnakkain muumuassa CSN:in, a-kassoitten ja Verolaitoksen kans. Se saattaa olla rikolista ette tietosesti ja tahahlaan jättää vääriä tietoja eli jättää antamatta tietoja muutoksista, jokka saattava vaikuttaa oikeutheen saa korvauksia. Siukkakassa ilmottaa poliisille kaikki mitä eppäilemmä avustus-rikokseksi (bidragsbrott).