Vammaskorvaus (Handikappersättning) Sie joka olet yli 19-vuotias saatat saa vammaskorvausta jos tarttet ekstra apua eli sulla oon ylimäähräisiä kostanuksia pysyvän siukkuuen eli heikentynheen toimintakyvyn (funktionsnedsättning) takia. Se ei ole se kuinka paljon toimintakyky oon heikentynny joka oon tärkeä ko sie haet korvausta, ko se mikä avuntarve ja mikkä kostanukset sulla tästä toimintakyvyn heikentymisestä oon. Kuka saattaa saa vammaskorvausta? Jos sie olet siukka eli sulla oon heikentynny toimintakyky sie saatat saa vammaskorvausta jyyli-/heinäkuusta lähtien sinä vuona ko täytät 19 vuotta (silloin sulla loppuu oikeus saa hoitoavustusta (vårdbidrag)). Siihen ette saa vammaskorvausta vaaithaan ette sie tarttet apua jokapäiväsessä elämisessä, apua työssä eli opinoitten kans eli ette sulla oon ekstra kostanuksia siukkuuen eli heikentynheen toimintakyvyn takia. Avuntarpheela häätyy olla suora yhtheys heikentynheesheen toimintakykhyyn, ja apu häätyy olla semmosheen mitä et itte klaaraa heikentynheen toimintakyvyn takia. Ei sulla tartte olla mikhään vissi siukkuus eli vissi heikentynny toimintakyky siihen ette saa a vammaskorvausta. Mutta sulla häätyy olla intyygi tohturilta josta näkkee ette sulla oon heikentynny toimintakyky joka vaikuttaa siihen ette et klaaraa jokapäivästä elämää, työtä eli opintoja. Tämä heikentynny toimintakyky häätyy ilmetä ennenkö täytät 65 vuotta, ja tarve saa tukea häätyy kestää vähhiinthään vuen ajan. Jos vieläki tarttet tukea ko olet täyttäny 65 vuotta, sulle jatkuu vammaskorvaus. Saatat saa vammaskorvausta jos olet töissä Ruottissa. Jos et ole töissä, sinun häätyy asua Ruottissa ennenkö saatat saa vammaskorvausta. Paljonko vammaskorvausta saapi? Vammaskorvaus oon 36, 53 eli 69 prosenttia hintaperusmäärästä (prisbasbeloppet) 1 ja riippuu sinun avuntarpheesta ja siittä kuinka suuret lisäkostanukset sulla oon heikentynheen toimintakyvyn takia. 1 (5)
Jos olet sokea Jos olet sokea eli sulla ei ole suuntausnäköä (ledsyn) saat vammaskorvausta 30 567 kruunua vuessa (69 prosenttia hintaperusmäärästä). Jos sulla oon koko siukkakorvaus eli aktiviteettikorvaus eli koko ikäpansuuni, vammaskorvaus pienenee ja oon 15 948 kruunua vuessa (36 prosenttia hintaperusmäärästä). Sie saatat saa korkeaman korvauksen jos sulla oon erityisen suuri avuntarve eli suuret kostanukset. Sokealla eli sillä ette ei ole suuntausnäköä meinathaan ette heikentynheen näön takia ei pysty turvalisesti olheen eikä löytämhään viehraassa miljöössä jos oon yksin. Jos olet kuuro eli sulla oon vaikea kuulovamma Jos olet kuuro eli sulla oon vaikea kuulovamma, saat vammaskorvausta 15 948 kruunua vuessa (36 prosenttia hintaperusmäärästä). Sie saatat saa korkeaman korvauksen jos sulla oon erityisen suuri avuntarve eli suuret kostanukset. Kuurola eli sillä ette jollaki oon vaikea kuulovamma meinathaan ette vaikka oon kuulolaite (hörapparat) ei kuule eli oon vaikea kuulla mitä muut ihmiset sanova. Avuntarve ja lisäkostanukset Jos sulla oon vain avuntarve, mutta ei lisäkostanuksia, avuntarve häätyy olla vähhiinthään kaks tiimaa päivässä ennenkö saat vammaskorvausta. Jos sie tarttet erityistä silmäläpitoa ja vaarilapitoa koko ajan, seki saatethaan ottaa matkhaan ko arviointi tehhään. Jos sulla oon avuntarvetta ja lisäkostanuksia, Siukkakassa arvioittee sinun kaikki tarpheet kokohnaisuuessa. Apua jokapäiväsessä elämisessä Avula jokapäiväsessä elämisessä meinathaan esimerkiksi apua pittää ittestä huolen, apua vaatittemisessa ja riisumisessa, kaupassa käynin, ruanlaiton, lääkheitten ottamisen ja huushollitöitten kans niinku pyykinpeso, tryykääminen, vaatheitten huolto ja stäätaus kotona. Avuksi jokapäiväsessä elämisessä räknäthään kans se ette mennä töihin eli kouhluun. Se saattaa kans olla praktista apua työpaikala, ko esimerkiksi ottaa framile pärmiä ja muuta työmateriaalia eli ette mennä ruokasalhiin ja tulla sieltä. Kostanuksia avusta jokäpäiväsessä elämisessä Jos tarttet kunnalista stäätaus-apua, saatat saa vammaskorvausta niistä kostanuksista jota kunta ottaa. Vississä taphauksissa saatat saa korvausta privaatti stäätaus-avusta kans, mutta korkeinthaan saman summan joka vastaa kunnan hintaa. Mutta jos joku omhainen saapi korvauksen siittä ette auttaa sinua jokapäiväsessä elämisessä, sitä ei räknätä kostanukseksi, se räknäthään ajaksi auttamisesta. Ekstra kostanukset Ennenkö saapi vammaskorvausta ekstra kostanuksitten takia, kostanuksitten ja heikentynheen toimintakyvyn välilä häätyy olla suora yhtheys. Silloin ei saa olla muuta tukimuotoa joka peittää kostanukset joista valtio, kunta eli landstingi oon päävastuussa. Eikä se saa olla semmonen kostanus joita usseimilla ihmisillä oon. 2 (5)
Kostanuksia apuvälihneistä Saatat saa vammaskorvausta esimerkiksi kostanuksista joita sulla oon sen takia ette tarttet enämpi tillaa asunossa ja jota tarvithaan hoito-laitheitten, teknisitten apuvälihneitten takia eli jota käytethään hoito-huohneena. Saatat kans saa korvausta apuvälihneitten hyyry- eli ostokostanuksista. Se jällaa kans jos taattoria tarttee anpassata eli sie tarttet erityisiä taattori-ohjelmia sinun heikentynheen toimintakyvyn takia. Terhveys- ja siukkahoito Saatat saa vammaskorvausta ko sinua hoiethaan avomessa terhveys- ja siukkahoi ossa joka kuuluu korkeakostanussuohjaan (högkostnadsskyddet). Korkeakostanussuoja tarkottaa ette sie et tartte maksaa enämpi ko vissin summan potilasmaksoja vuen aikana. Tämä jällaa ko käyt tohturin vasthaanotola ja ko saat niin sanottua siukkuutta hoitavaa käsittelyä, eli hoitoa jonka esimerkiksi disktriktisysteri eli siukkavoimistelia (sjukgymnast)antaa. Lääkheet Saatat saa vammaskorvausta lääkheistä joita valtio rahalisesti tukkee (subventionerar) ja jokka sisältyvä korkeakostanussuohjaan. Korkeakostanussuoja jällaa kohta kaikkia lääkheitä jokka vaativa resähtin. Käyttötarvikheita Monessa taphauksessa saattaa saa korvausta siukkahoito-laitoksesta käyttötarvikheishiin. Mutta jos itte jou ut maksamhaan käyttötarvikheista, saatat vississä taphauksissa saa korvauksen siittä kostanuksesta. Erityisruoka Jos sulla oon ekstra kostanuksia erityisruasta, jota tarttet sinun heikentynheen toimintakyvyn takia, saatat saa korvauksen niistä kostanuksista. Konsumentverkki räknää erityisruoka-kostanukset eri ruoka-tyypile. Ennenkö saat korvausta erityisruokaa varten, tohturi, dietisti eli vastaava oon häätyny määrätä sen. Hammashoito Saatat saa vissin korvauksen hammashoitoa varten jos se johtuu sinun heikentynheestä toimintakyvystä. Kostanuksia reisuista Ylheiset kulkuneuot Jos sie et pysty käyttämhään ylheisiä kulkuneuoja sinun heikentynheen toimintakyvyn takia ja sen takia saat lisäkostanuksia reisuista, saatat saa visiin korvauksen. Se jällaa esimerkiksi jos jou ut käyttämhään kuljetuspalvelua (färdtjänst) ja maksat siittä. Saatat saa koko makson korvattua. Siittä vähenethään se mitä se olis maksanu jos olisit käyttäny ylheisiä kulkuneuoja. Oma biili Jos reisaat omala biililä sen takia ette et saata käyttää ylheisiä kulkuneuoja, saatat saa vammaskorvausta siukka- ja hoitoreisuista ja työ- ja opintoreisuista. Ko oon kyse reisuista kouhluun, korvauksesta vähenethään se summa joka vastaa siihen mitä olisit maksanu jos olisit käyttäny ylheisiä kulkuneuoja. Muista reisuista jokäpäiväsessä elämässä saatat saa 2 220 kruunun korvauksen vuessa (5 prosenttia hintaperusmäärästä). Jos saatat näyttää ette sulla oon korkeamat kostanukset, saatat saa korkeaman korvauksen. 3 (5)
Erityisitten huusholli-laitheitten osto Jos tarttet ostaa esimerkiksi pyykikonheen, tiskikonheen eli erityisen imurin (dammsugare) sinun heikentynheen toimintakyvyn takia, saatat saa siittä korvauksen. Ko korvausta semmosista ostoista räknäthään, kostanus jaethaan vissile määräle vuosia. Kuluminen ja muuta Jos sinun heikentynny toimintakyky aiheuttaa ette vaatheet kuluva enämpi, sulla oon ekstra kostanuksia pyykistä, kalustheista (inredning) eli laitheista kotona, saatat saa vammaskorvausta niistä. Eri asumismuotoja Hoito siukkatuala ja muissa laitoksissa Jos sinua hoiethaan siukkatuala eli jossaki muussa laitoksessa (institution), saat pittää sinun vammaskorvauksen jos hoito räknäthään kestävän korkeinthaan kuus kuukautta. Jos hoito kestää pitemphään ko kuus kuukautta, saatat saa vammaskorvausta vain niiltä päiviltä ko et ole hoito-laitoksessa. Niistä maksoista jokka sulla oon hoitamisesta, et saata saa korvausta. Laitos oon perhekoti (familjehem), siukkatupa eli hoitolaitos jonka joko valtio, kunta eli landstingi joko omistaa eli kostantaa. Palveluasunto (servicebostad) eli ryhmäasunto Jos asut palveluasunossa eli ryhmäasunossa, saat ussein palvelua joka vastaa sitä apua josta muuten olisit saanu vammaskorvausta. Mutta sulla saattaa olla semmosen avun tarve jota palvelu asumisessa ei anneta. Asumisesta saattaa kans olla kostanuksia joka nähhään lisäkostanuksina ko vammaskorvausta räknäthään. Ota sen takia yhtheys Siukkakassan kans ette saat tietää mitä sinun taphauksessa jällaa. Oppilaskoti eli erityiskoulu Jos asut oppilas-kotissa saatat saa vammaskorvausta jos sulla oon kostanuksia henkilökohtasen avun eli palvelun takia. Tämä jällaa oppilas-kotia valtiolisessa erityiskoulussa valtakunnalisessa lukiossa (riksgymnasium) kuuroile eli kuulovammasille nuorile valtakunnalisessa lukiossa nuorile joila oon rajotettu liikkuminen. Muita korvauksia Kertasumma Jos olet saanu korvausta kertasummana privaatista vakkuutuksesta se ei vaikuta sinun oikeutheen saa vammaskorvausta. Jos olet saanu korvauksen jostaki kertasummana valtiolta, kunnalta eli landstingiltä, et saata saa vammaskorvausta samasta asiasta. Korvaus valtiolta, kunnalta eli landstingiltä Jos saat muita korvauksia valtiolta, kunnalta eli landstingiltä ja joka oon tukea sinun avuntarpheele eli kostanuksile joita sulla oon heikentynheen toimintakyvyn takia, 4 (5)
saatat saa vammaskorvausta vain jos oon kyse semmosesta avusta eli semmosista kostanuksista joista et jo ole saanu korvausta. Siukkakassa saattaa kans tehhä arvioinin ette sinun pitäs saa korvausta avuntarpheesheen eli kostanukshiin muussa muo ossa ko vammaskorvaus. Mitenkä vammaskorvausta haethaan? Sie haet vammaskorvausta blanketilla joka oon Siukkakassala ja meän webbpaikala www.forsakringskassan.se. Saatat saa apua Siukkakassasta hakemusblanketin täyttämisessä. Sinun pittää kans jättää tohturin intyygi sinun siukkuuesta eli heikentynheestä toimintakyvystä. Jos sie nykysin olet jättäny tohturin lausunon (utlåtande), sie et piiain tartte jättää uutta. Saatat valittaa päätöksestä johon et ole tytyväinen Jos et ole tytyväinen päätöksheen jonka saat, sie saatat valittaa siittä lääninoikeutheen (länsrätten). Sie hääyt valittaa kahen kuukauen sisälä. Mitenkä sie tehet ko valitat, siittä oon kirjotettu päätöksessä. Jos tarttet apua valituksen tekemisessä, ota yhtheys Siukkakassan kans. Ulosmakso Vammaskorvaus maksethaan ulos joka kuukausi. Jos halvaat ette sinun vammaskorvaus maksethaan jollekki muule, sie hääyt jättää kirjotetun valtakirjan (fullmakt) Siukkkassale ja sanoa kelle rahat pittää maksaa. Ulkomaila asuminen Jos meinaat asua ulkomaila jossaki EU/EES-maassa, sie saat pittää vammaskorvauksen korkeinthaan 12 kuukautta. Jos asut maassa joka oon EU/EES:än ulkopuolela, raja pittää jäljelä korvauksen oon kuus kuukautta. Jos tulet takasi Ruothiin, saatat taas hakea vammaskorvausta. Olla töissä ulkomaila Saatat saa vammaskorvausta jos asut Ruottissa ja olet töissä ulkomaila. Mutta et saa olla töissä ulkomaila enämpää ko 12 kuukautta ette saat pittää sinun vammaskorvauksen. Jos olet töissä jossaki EU/EES-maassa, sulla oon oikeus saa korvauksen siittä maasta jossa olet töissä. Ilmota aina muutoksista! Sie hääyt ilmottaa kaikista muutoksista jokka koskeva sinun avuntarvetta eli kostanuksia eli muita olosuhtheita jokka saattava vaikuttaa sinun oikeutheen saa vammaskorvausta. Jos olet ottanu vasthaan liikaa rahhaa, saatat joutua maksamhaan net takasi. 5 (5)