EQQARTUUSSISOQARFIK SERMERSUUMI EQQARTUUSSUTIP ALLASSIMAFFIATA ASSILINEQARNERA Ulloq 3. februar 2016 Eqqartuussisoqarfik Sermersooqmit suliami sul.nr. SER-NUU-KS 0216-2015 Unnerluussisussaatitaasut illuatungeralugu unnerluussaq Pt. Detentionen Nuuk Unnerluussisussaatitaasut journaliata nr. 5505-97431-00147-15. oqaatigineqarpoq imaattoq E Q Q A R T U U S S U T: Suliaq suliarineqarpoq eqqartuussisooqataasartut peqataatillugit. Unnerluussut Unnerluussissut ulloq 11. december 2015-imik ulluligaavoq eqqartuussivimmilu tiguneqarsimalluni ulloq 17. december 2015. Unnerluussaq makkuninnga unioqqutitsinermut unnerluutigineqarpoq Unnerluussissut issuarneqarsinnaanngilaq scannerneqarnera kisiat pigineqarmat. Allagaatinik takunnissinnaatitaanermik eqqartuussisoqarfimmut noqqaassuteqartoqarsinnaavoq. Piumasaqaatit Unnerluussisussaatitaasunit piumasaqaatigineqarpoq: Piffissami aalajangigaanngitsumi tarniluttut inissiisarfimmi, Danmarkimi Pinerluuteqarsimasunut isumaginnittoqarfiup ingerlataani, paarineqarnissaa, tak. Pinerluuttulerinermik inatsimmi 161, imm. 2.
Unnerluussaq pisimasoq 1-2-imi persuttaanermut nassuerpoq, sioorasaarinermullu pingitsuunerarluni. Pisimasunut 3, 4, 5, 6, 7, 8, aamma 9-mi pinngitsuunerarpoq. Illersuisoq Naja Joelsen piumasaqaateqarpoq Nunatsinni pineqaatissinneqarsimasunut inissiisarfimmi ukiuni marlunnik sivisunerunngitsumik inissinneqarneq, pinerluttulerinermi inatsimmi 146 naapertorlugu. Uppernarsaasiineq Nassuiaatit Suliaq suliarineqartillugu unnerluussaq, ilisimannittoq 1, ilisimannittoq 2, ilisimannittoq 3, ilisimannittoq 4, aamma ilisimannittoq 5, ilisimannittoq 6, ilisimannittoq 7, ilisimannittoq 8, ilisimannittoq 9, kiisalu ilisimannittoq 10, ilisimannittoq 11, ilisimannittoq 12, ilisimannittoq 13 nassuiaateqarput. Unnerluutigineqartup, unnerluussap nassuiaataa eqqartuussisut suliaannik allassimaffimmi ulloq 14. januar 2016-imeersumi issuarneqarpoq. Ilisimannittut, ilisimannittoq 1, ilisimannittoq 2, aamma ilisimannittoq 3, ilisimannittoq 4, ilisimannittoq 5, kiisalu ilisimannittoq 6, nassuiaataa/nassuiaataat eqqartuussisut suliaannik allassimaffimmi ulloq 14. januar 2016. -imeersumi issuarneqarput. Ilisimannittut, ilisimannittoq 7, ilisimannittoq 8, aamma ilisimannittoq 9, ilisimannittoq 10 kiisalu ilisimannittoq 11, nassuiaataat eqqartuussisut suliaannik allassimaffimmi ulloq 15. januar 2016. - imeersumi issuarneqarput. Ilisimannittut, ilisimannittoq 12 aamma ilisimannittoq 13, nassuiaataat eqqartuussisut suliaannik allassimaffimmi ulloq 20. januar 2016. -imeersumi issuarneqarput. Pappiaqqatigut uppernarsaatit Suliami uppernarsaatitut saqqummiunneqarput suliani tamani anmeldelsesrapportit aamma (pisimasoq 1-2 politiattest bilag E-1-1, assit bilag F-1-1, kosterrapport bilag F-2-2.) (Forhold 6 politiattest bilag E-1-1, videofilet.) (forhold 7 videofilet.)
Paasissutissat inummut tunngasut Unnerluussaq siusinnerusukkut pineqaatissinneqarnikuuvoq suliamut matumunnga pingaarutilimmik: 2006-mi qaammatini arfinilinni pineqaatissinneqarsimasunut inissiisarfimmiittussanngortinneqarsimasoq ilaatigut siorasaarisimalluni pisortat oqartussaatitaannik narrunarsaarisimalluni nakuusersimallunilu. 2007-imilu aamma eqqartuunneqarsimalluni ukiumi ataatsimi pineqaatissinneqarsimasunut inissiisarfimmiititsinermik ilaatigut nakuusersimalluni. 2008-mi eqqartuussutaani eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngorlugu ilaatigut pinerluttulerinermi inatsimmi 37 taamanikkut 16 pisortat oqartussaatitaannik narrunarsaaneq unioqqutissimallugu pineqaatissinneqarsimasunut inissiisarfimmiititaanermini anstaltbetjentimut iliuuseqarsimanermigut. 2009 eqqartuunneqarpoq ulluni 30-ni pineqaatissinneqarsimasunut inissiisarfimmiittussanngorlugu, tamannalu Nunatta Eqqartuussisuuneqarfiata sakkortusivaa pineqaatissinneqarsimasunut inissiisarfimmiittussanngortitaanera ullunut 60-inut aalajangiiffigigamikku pinerluttulerinermi inatsimmi taamanikkut 16, aamma 70 maannakkut 37 aamma 98 siorasaarineq aamma pisortat oqartussaatitaannik narrunarsaarineq politiinut iliuuserisimagamiuk. 2011-mi eqqartuunneqarpoq qaammatini arfinilinni pineqaatissinneqarsimasunut inissiisarfimmiittussanngorlugu ilaatigut pinerluttulerinermi inatsimmi 113 unioqqutissimallugu aserorterineq politiinut iliuuserisimallugu, nakuusernermilu pinngitsuutinneqarluni isersimaqatiminut politiit ilisimannittoq pissarsiarisinnaasimanngimmassuk. 2011-mi eqqartuunneqarpoq qaammatini 9-ni pineqaatissinneqarsimasunut inissiisarfimmiittussanngorlugu ilaatigut aserorterinermut, nakuusernermut, siorasaarinermullu imerniartarfiup sulisuinut. 2013 unnerluutigineqartoq eqqartuunneqarpoq ukiuni marlunni qaammatinilu pingasuni pineqaatissinneqarsimasunut inissiisarfimmiittussanngorlugu ilaatigut pisortat oqartussaatitaannut narrunarsaarinermut, anstaltbetjentimut siorasaarinermut, isersimaqatiminut sakkortuumik nakuusernermut ilaatigut taxanik aquttoq toqqusassisimallugu. Eqqartuussummi tassani pisimasut 7-iusuni 6-ni pisuutinneqarpoq tigummigallarneqarnermini iliuuserisaani. 2014 unnerluutigineqartoq qaammatini 5-ni pineqaatissinneqarsimasunut inissiisarfimmiittussanngortinneqarpoq pisuutinneqarluni tallimariarluni pisortat oqartussaatitaannik narrunarsaarisimasutut kiisalu ikiaroornartoq pillugu nalunaarummik unioqqutitsineq pineqaatissinneqarsimasunut inissiisarfimmiitinneqarnermi nalaani Eqqartuunneqartup inuttut atugarisaanut tunngatillugu saqqummiunneqarput: Retspsykiatrisk erklæring TA ledende overlæge speciallæge i psykiatri, bilag E-2-1 inerniliissutaa.
Retspsykiatrisk erklæring fra Retslægerådet bilag E-1-1. Unnerluussut ulloq 11. april 2008-meersoq. Eqqartuussisut suliaanik allattorsimaffik ulloq 5. maj 2008-meersoq. Nunatta eqqartuussiviata suliaanik allattorsimaffik ulloq 23. december 2010-meersoq. Nunatta eqqartuussiviata suliaanik allattorsimaffik ulloq 23. december 2009-meersoq. Eqqartuussisut suliaanik allattorsimaffik ulloq 18. april 2011-meersoq. Eqqartuussisut suliaanik allattorsimaffik ulloq 10 oktober 2011-meersoq. Unnerluussut ulloq 8. september 2011-meersoq. Eqqartuussisut suliaanik allattorsimaffik ulloq af den 10. september 2013. Unnerluussut ulloq 28. september 2012-meersoq. Unnerluussummut ilassut ulloq 16. april 2013-meersoq. Eqqartuussisut suliaanik allattorsimaffik ulloq af den 14. november 2014. Kriminalregister. Unnerluussaq inuttut atukkani pillugit ilisimatitsivoq, Sakkortuvoq Hersted Vesterimiilluni. Eqqarsaaterpassuit kaavipput. Gåtur-leraangami malugivaa håndjerneqarluni bælteqalerlunilu ingattarsertutut isigai ullut 34 inunnik allanik ineqateqanngilaq aamma ullut marluk nerinngilaq, taava ammasumut nuuppoq. Tarnip nakorsaa T assut apeqquserpaa. Imerajuppasippoq blinkeqattaaginnavippoq, naammanngittutut isigaa. Nutserisoq pikkorissimanngilaq nassuiaatini eqqunngittumik nutserisarpoq. Assorujuk mentalundersøgelse allanngortikkusukkaluarpaa kisiat illersuisoq sujumanngilaq, aamma taarserpaa kalerreeqqaarnani iliuuseqarmat taarserpaa. Malugigamiuk nutserineq iluanngittoq oqalukkumajunnaarnikuuvoq. Takusuusisarnersoq apersorpaa. Suunngittunut kamannerartittarnnini ilumuunngillat. Forvarring tusaramiuk upperinngilaa. Kisiat anigami eqqarsaatigilluarlugu inissikkamiut tupaqqaqaaq sinissinnaanani issiasinnaanani imminut aqussinnaanani. Ajoqutigeriarlugu iluaqutigaa eqqarsartalerpoq inuunini pillugu. Soorlu aallaqqaamut kamani takuaa, erniminut nassiussassani nassiukkusukkamigit timmisartukkoortikkusutani umiarsuartissimavaat aamma 3000 A-mut nassiussani juullertinnagu apuutsikkusutai aatsaat 27-ani ikivaat, imminut noqippoq tamanna ilikkalerpaa, aamma takusinnaalerpaa inoqatiminut ersiortitsisimalluni. Inuunini allanngortissavaa. Erniminut akisussaaffeqarluni takusinnaasimanngilaa. Inuusuttuaraallunili atugarisimavaa naalakkersuiniakujunneq. Aatsaat takulerpaa. Kanngusuppoq video takullugu. Tamakku piingaatiarput. Pisuutitsinerit assut pigisarparsimavai. Susassarinngisaminut akuliuttarsimalluni nalunngilaa. Herstedvesterimi igasinnaanngorpoq, sakkussaminik pingaatsiarpoq, aamma inunnut saaffiginnikkaangami mianersortalernikuuvoq. Ilassisut ilassisarpai siornatigut akerusunnagit. Eqqarsartariaasia assut allanngorpoq. Meeraavoq nuannersumik, timersorluni, aneerluni. ADHDersimagunarluni inuit amerlasuut akornaniissinnaanani malugeqqaarnikuuaa, massakkut inuit
amerlasuut akornaniikkusunnerulernikuuvoq. Anaanakkuni tutillugillu atuarfimmi qiakkaarisalernikuuvoq. Angajuata mittatigisarnikuuaa kisiat naluaa tamanna sunniuteqarnersoq. 17-nik ukioqarluni Nuummut pigami aatsaat paasivaa ikiaroornartoqartoq aamma hjemløseqartoq. Taamanili paatsiveeruppoq. Anaanani ataatanilu attavigilluarpai. Sumiginnagaanikuunngilaq. Ernini pillugu Nuummiippoq. Allatuulli inoorusuppoq. Suliffittaarusuppoq. Ullaakkut makissinnaaneq, igasinnaaneq ilikkarpai. Ernini oqarsinnaatikkusuppaa ataataga sanasuuvoq. Anaanaata ernertik tunniukkusuppaa imminut. Eqqartuussisut tunngavilersuutaat inerniliinerallu Pisuunermik naliliineq Eqqartuussisut unnerluutigineqartoq pisuutippaat pisimasuni 1 aamma 2-mi pinerluttulerinermi inatsimmi 88 aamma 98 nakuuserneq siorasaarinerlu unioqqutissimagai. Unnerluutigineqartup nakuusernermut pisuunerminik nassuerpoq, siorasaarinermulli pisuunerminik misiarluni. Unnerluutigineqartup ilisimannittullu nassuiaataat assigiinngillat. Suliami pinerlineqartoq nassuiaateqarumasimanngilaq.unnerluutigineqartoq nassuiaavoq, Ilisimannittoq 13 tillussimallugu, tamatumalu kinguneranik Ilisimannittoq 13 uppissimasoq nerriviullu sinaanut aporsimalluni nutsamilu killingagut kilersimalluni. Eqqartuussisut tunngavilersuutigaat ilisimannittut 1-ip aamma ilisimannittup 13-p nassuiaataat, unnerluussap Ilisimannittoq 13 saviup tigummivianik anaasimagaa. Taamatullu aamma eqqartuussisut pingaartippaat ilisimannittp 7-ip unnerluutigineqartullu nassuiaataat, Ilisimannittoq 13 eqqortinnermi kingunerisaanik nakkarnermini nerriviup sinaa aporfigisimagaa niaqqumigullu kilerluni.unnerluussisullu uppernarsaataani tamanna uppernarsineqarsorineqarpoq, nakorsap politiinut uppernarsaataanni assinilu takuneqarsinnaammat isaa saamerleq ataatsimik tilluusaqartoq narlortumillu kilersimasoq 4 cm-itut angitigisumik 3-4 mm-itullu ititigisumik. Taamaalillutik eqqartuussisut uppernarsivaat unnerluutigineqartup Ilisimannittoq 13 saviup tigummivianik anaaneratigut uppitissimagaa nerriviullu sinaanut aporsimasoq qaamigullu kilerluni. Siorasaarinermut atatillugu, unnerluutigineqartoq nassuiaavoq, oqarsimalluni, kiisami toqqilerpakkit. Tamannalu eqqartuussisunit paatsoorneqarsinnaasutut isigineqarpoq imatut, kiisami toqulerpakkit. Eqqartuussivimmut nassuiaatigineqarpoq ilisimannittunit ilisimannittup 7-imit aamma ilisimannittup 1-mit unnerluussap Ilisimannittoq 13 saviup tigummivianik anaagaa. Unnerluutiginneqartup savimmik tigumminninneratigut, kiisalu pisut ataqatigiinneri aallaavigalugit, oqaatigineqartorlu, oqarlunilu kiisami toqqilerpakkit, tamanna eqqartuussisut siorasaarinertut isigivaat, tassami inuup inuuneranik peqqissusaanik atugarissaanissaanillu
annilaangatitserujussuarsimammat. Uppernarsineqanngilaq unnerluutigineqartoq nakuusernermut unnerluussummi oqaatigineqartutut nakuusersimanersoq, taamaattumillu unnerluussutip sinneranik pinngitsuutinneqarluni. Eqqartuussivimmi eqqartuusseqataasut marluk pisimasumi 3-mi unnerluutigineqartoq pinngitsuutippaat pinerluttulerinermi inatsimmi 98-imik- siorasaarinermik unioqqutitsisimasutut. Unnerluutigineqartoq pisuunerminik misiarsimavoq. Eqqartuussisup eqqartuusseqataasullu aappaata pingaartippaat unnerluutigineqartoq inimi parnaarussivimmi parnaaruteqqaneqarsimammat, siorasaarisimagaaneralu højtalerikkut sulisumit tusaaneqarsimalluni. Atinik taasaqartoqarsimanngilaq. Unnerluutigineqartoq nassuiaavoq, angut inuusuttoq nipiliortorujussuusimasoq nillialluni matulu isimmittarlugu. Taamaattumillu eqqartuusseqaataasut marlut isumaqarput uppernarsineqanngitsoq ilumut unnerluutigineqartup kisimi mattussaaqqalluni oqaatsit taamaattut oqaatigisimanerai. Taamaattumillu eqqartuussisut nalornineq aallaavigalugu unnerluutigineqartoq pinngitsuutippaat. Eqqartuussisut pingajuata pisuutinneqarnissaa piumasarisimagaluarpaa, politiip nassuiaataa uppernartuummat, tassami oqarmat nipi unnerluussap inaaneersuunera tusaasimammagu unnerluusarlu oqarsimammat toqussimassagaluarpara, ajoqaaq AK47-mut akissaqannginnama, tamannalu politiimut annilaangalersitsisimavoq. Eqqartuussisut unnerluutigineqartoq pisimasuni 4-mi aamma 5-mi pisuutippaat pinerluttulerinermi inatsimmi 98 siorasaarineq unioqqutissimagaa. Unnerluutigineqartoq pisuunerminik misiarpoq. Pinerluttulerinermi inatsimmi 98 malillugu unioqqutitsineruvoq siorasaarineq, siorasaarinerlu inuup inuuneranut peqqissusaanullu ajoquserneqarnissaanillu annilaangatitserujussuarnermik kinguneqarsimappat. Taamaattumik 98 nakuusernernut sioorasaarinernut tamanut atuutinngilaq, siorasaarinerillu nakuusernertallit aalajangersakkamut ilaatinneqanngillat. Ataatsimoorussamik nalilersuisoqartariaqarpoq siorasaarinerup pisumi, siorasaarinerup pinerani pissutsit qanoq ittuunerat aallaavigalugu pinerluttulerinermi inatsimmi 98-ip iluaniinnersut. Ataatsimullu isigalugu eqqartuussisut pisoq unnerluussisussaatitaasut nalunaarutiginninnermi rapportianni uppernarsineqartumilu sanilliussinermi, unnerluutigineqartoq pisuutinneqarpoq unnerluussisummi unnerluutigineqarnermisut. Eqqartuussisut pingaartippaat unnerluutigineqartup nammineq nassuiaataa, A-p tunniussaanut normumut sianersimalluni, arnallu telefoni tigusimagaa. Kamassimalluni ilaatigullu oqarsimalluni toornarsuk tiaavuluk assigisaanilluunniit eqqaamanngisaminik. Nangillunilu nassuiaavoq, oqaatigisani ilumoorunnagit, aammalu piviusunngortikkunnarnagit, kiisalu 2-3-riarluni sianersimalluni.
Ilisimannittoq 3 nassuiaavoq, ikinngutini tusaassut unnerluutigineqartoq arlaleriarluni sianersimasoq, nilliasimallunilu siorasaarlugulu aqqaluaata unnerluutigineqartup aningaasaatai tillissimammagit, unnerluutigineqartullu nalunnginnerarlugu ilisimannittoq 3 qanoq isikkoqarnersoq anigunilu ujarniarlugu. Nassuiaataanik issuaavigineqarluni ilanngussaq D-1-1, ilisimannittoq nassuiaavoq, ilumoortoq unnerluutigineqartup siorasaarsimagaani unatarumalluni, tamaasa ujarniarlugit suujunnaarlugillu sequtserniarlugit. Ilisimannittoq nassuiaavoq nammineq inuunerminik kiisalu aqqalussami inuunerata uloriarnartorsiornissaa annilaangagisimallugu. Unnerluutigineqartoq ataasiaannarluni sianersimanngilaq arlaleriarlunili sianersimavoq, ilisimannittullu sianeraangat mobili tigussaarmagu normukkut isertortukkut sianertaarsimavoq. Eqqartuussisut ilisimannittup nassuiaataa uppernartutut isigivaat, maluginiarsimallugulu qiasimammat malunnarlunilu assut siorasaarutinut attorteqqasoq nassuiaanermini, unnerluutigineqartullu nassuiaanermini nalaani najuunneranut assut erserpasikkami. Eqqartuussisut unnerluutigineqartoq pisimasumi 6-mi pisuutippaat pinerluttulerinermi inatsimmi 37 pisortat oqartussaatitaannik narrunarsaarisimasutut. Unnerluutigineqartoq pisuunerminik misiarpoq. Eqqartuussisut pingaartippaat unnerluutigineqartup nammineerluni nassuiaatigisaa oqarsimammat suli paasinngilisiuk tillutara kinaagaluaruniluuniit noqartussaammat. Tamannalu ilisimannitumit ilisimannittoq 5-imit uppernarsineqarpoq, oqaatsit taakkua anstaltbetjent ilisimannittoq 4-mut saalluni oqaatigineqarsimammata, tamannalu aamma uppernarsineqaqqippoq ilisimannittoq 4-p nassuiaaneratigut, tassa isersimasuutertik alla oqaloqatigitillugu unnerluussaq takkussimasoq oqaloqatigiinnerallu kipitiinnarlugu nippallunilu oqarsimasoq punnermik aallerit! ilisimannittoq 4-p unnerluussaq pissuserissaarneroqqullugu oqarfigisimavaa taamaaliunngikkuni ineeqqaminukartinneqassammat. unnerluussarlu kamassalersimavoq timini sukallugu ilisimannittoq 4-llu kiinaa qanillivillugu nilliaffigalugu. Ilisimannittoq 4 siorasaaneqartutut misigisimasimavoq unnerluussarlu ungasillisinniarlugu ajassimallugu, unnerluussarlu ilisimannittoq 4 - mi assaatigut patissimavaa ajatsineralu akillugu, taamaattumillu ilisimannittoq 4-ip unnerluussaq inaata tungaanut ajassimavaa. Unnerluussaq inimini suli kamassarsimavoq håndjernilerumasimananilu. Sulisut tamakkiuttariaqarsimavaat unnerluussaq taamaalitinnermini oqaluttoq isumaqassanngilatit allaniit manngernerullutit aniguma qanorluunniit naapittussaavakkit. Eqqartuussisut isumaqarput taamatut oqarnera pisortat oqartussaatitaannik narrunarsaarinerusoq, taamaaliornerlu uppernarsaasiiffigineqarpoq ilisimannittut nassuiaataannit kiisalu videokkut immiussanit, takuneqarsinnaammat unnerluussaq kamassartoq ilisimannittoq 4-lu sulinerminut atatillugu qanoq iliuuseqartoq ajallugu, unnerluutigineqartoq unnerluussummi unnerluutiginearnermisut
pisuutinneqarpoq. Eqqartuussisut unnerluutigineqartoq pisimasoq 7-imi pisuutippaat pinerluttulinerinermi inatsimmi 37 pisortat oqartussaatitaannik narrunarsaarisutut. Unnerluutigineqartoq pisuunerminik misiarpoq. Eqqartuussisut tunngavigivaat unnerluutigineqartup nassuiaatai, ilaatigut sulisunut oqarsimammat Ersigisuusaarunnaarniarsinga. Ilisimannittut ilisimannittoq 8, Ilisimannittoq 13 aamma ilisimannittoq 9 nassuiaapput, unnerluussaq kamassarsimasoq nerriviullu qaaniittunik eqqaalluni aserorteranilu, taamaattumillu qanoq iliuuseqartariaqarsimallutik. Ilisimannittoq 9 aamma ilisimannittoq 10 assigiimmik nassuiaapput unnerluussaqp ilisimannittoq 8 Ilisimannittoq 13 periarfigisimagaa, soorlumi tillunniartutut pisusilersorfigalugu ilaatigullu nilliasimalluni, Tiaavuluk toornaarsuk, anat, qaa qaangaluariaritsi assingusunilluunniit oqalulluni, unnerluussisullu uppernarsaataanni videokkut immiussani uppernarsineqarpoq unnerluusap qununarsaarlunilu nillianera, nillataartitsivik matorluttaarlugu uppitingajallugu nerriviullu qavaniit atortunik uppikaatitsilluni eqqaallunilu tamakkualu isimmittarlugit. Tamakkua eqqartuussisut isigivaat pisortat oqartussaatitaannik narrunarsaarinerusut taamaattumillu unnerluutigineqarneratut unnerluutigineqartoq pisuutinneqarpoq. Eqqartuussisut unnerluutigineqartoq pisimasoq 8-mi pisuutippaat pinerluttulerinermi inatsimmi 37 pisortat oqartussaatitaannik narrunarsaarisutut. Unnerluutigineqartoq pisuunerminik misiarpoq. Unnerluutigineqartoq nassuiaavoq paasisimallugu ilisimannittoq 6-p nalunaarutigisimagaani, tamatumalu kingunerisimagaa ernerminit pulaarneqarsinnaajunnaarnera. Oqarsimavoq tamanna ilisimannittoq 6-p pisuusutigigaa kanngusoqqusimallugulu. Eqqartuussiviup tunngavigivai ilisimannittut ilisimannittoq 6-p aamma ilisimannittoq 11-p assigiimmik nassuiaataat, unnerluutigineqartoq aallaamasimammat sulisunullu qununarsaarluni ilaatigullu oqarsimalluni ilisimannittoq 6 pisuusoq ernini sivisuumik takusinnaajunnaaramiuk tassunga atatillugu oqarsimalluni pisassat pissavat assigisaanilluunniit. Eqqartuussisut unnerluutigineqartoq unnerluussisummi oqaatigineqartutut pisuutippaat. Eqqartuussisut unnerluutigineqartoq pisimasoq 9-imi pisuutippaat pinerluttulinerinermi inatsimmi 37 pisortat oqartussaatitaannik narrunarsaasutut. Eqqartuussisut tunngavigivaat unnerluutigineqartup nammineq nassuiaatai, oqarsimammat angutaanngilatit qanorluunniit paneqarputit. Taamatuttaaq eqqartuussisut ilisimannittup ilisimannittoq 4-p nassuiaatai pingaartippaat, unnerluusaq aallaamasorujussuusimammat ilaatigullu oqarsimalluni angutaanngilatit
qanorluunniit paneqarputit, illoqarfimmi naapittussaavakkit. Pisimasut uuma pisut siunitsiannguani pisut eqqarsaatigalugit, soorlu immikkoortumi 6-mi ulloq 16. maj 2015 pisimasoq, immikkoortumi 7 ulloq 17.maj 2015 pisimasoq aamma immikkoortoq 8 ulloq 22. maj 2015 pisimasoq, sulisunut amerlanernut aallaamasimasorujussuuvoq qununarsaarsimallunilu. Ilisimannittullu unnerluutigineqartup oqaaserisai imminerminut ilaquttaminullu siorasaarutitut paasisimavai, ilisimannittorlu oqaaserineqartunut assut sunnerteqqasimavoq, marloriarlunilu qiasimalluni taamaalillunilu uppernarsineqarluni unnerluutigineqartoq unnerluutigineqarnermisut pisuutinneqarluni. Pineqaatissiissut pillugu Oqaatigineqassaaq unnerluutigineqartoq Nuummi isertitsivimmiitinneqarallarmat, Nuummi pineqaatissinneqarsimasunut inissiisarfiup tigorusunngimmagu, paarisinnaanagulu tassami anstaltbetjentit amerlanerit suliami ilisimannittuummata imaluunniit pinerlineqartuullutik. Taamatullu aamma unnerluutigineqartoq eqqartuussisoqarfiup ullormi 26. maj 2015 aalajangigaani tarnimikkut katsorsaasartunik aqunneqartumi Qallunaat Nunaanni Pinerluttunut Isumaginnittoqarfiup aqutaanik tigummigallagaanerata nalaani, inissikkallarneqarsimammat, eqqartuussisarnermi inatsimmi 371, imm. 1 tunngavigalugu. Kisiannili retslægerådinit ullormi 2. oktober 2015 nalunaarutigineqarsimavoq eqqartuunneqartoq niaqulaartuunngitsoq, kisiannili nalilerneqarsimalluni Inuttut pissusimigut assut inoqatiminut akuliunniarnermigut akornusersimavoq, neriuutaarutiasuulluni, puffajasuulluni, akisussaassususermik tigusiumanngittuulluni, imminut pavunga isigaluni, imminut pisuutissinnaanani misiginneqataasinnaanani kiisalu periataartarluni kukkunini ilinniarfigissanagit pisuutitsisuullunilu. Unnerluutigineqartoq pasitsaassimaneqarpoq ADHD-mik nappaateqarsoralugu, tamannali uppernarsineqarsimanani. Eqqartuussivimmut vagtmester ilisimannittoq 12-mit nalunaarutigineqarsimavoq sulisut 7-it sulinerminni atugarliuuteqartarsimasut unnerluutigineqartoq pissutigalugu, sulisullu affaat sinnerlugit post traumatisk stresseqalersimasut unnerluutigineqartup sullinneratigut. Unnerluutigineqartoq pisuutinneqarpoq pinerluttulerinermi inatsimmi 37 sisamariarlugu unioqqutissimagaa pineqaatissinneqarsimasunut inissiisarfimmiitinneqarnermini nalaani sulisunut iliuuseqartarnermigut. Pillagaasimanermut uppernarsaammi uppernarsaatigineqartumi erserpoq, unnerluutigineqartoq 2006-mi qaammatini arfinilinni pineqaatissinneqarsimasunut inissiisarfimmiittussanngortinneqarsimasoq ilaatigut siorasaarisimalluni pisortat oqartussaatitaannik narrunarsaarisimalluni nakuusersimallunilu. 2007-imilu aamma eqqartuunneqarsimalluni ukiumi ataatsimi pineqaatissinneqarsimasunut
inissiisarfimmiititsinermik ilaatigut nakuusersimalluni. Unnerluutigineqartorlu eqqartuussisoqarfiup 5. maj 2008-mi eqqartuussutaani eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngorlugu ilaatigut pinerluttulerinermi inatsimmi 37 taamanikkut 16 pisortat oqartussaatitaannik narrunarsaaneq unioqqutissimallugu pineqaatissinneqarsimasunut inissiisarfimmiititaanermini anstaltbetjentimut iliuuseqarsimanermigut.taamatullu aamma unnerluutigineqartoq ullormi 13. november 2009 eqqartuunneqarpoq ulluni 30-ni pineqaatissinneqarsimasunut inissiisarfimmiittussanngorlugu, tamannalu Nunatta Eqqartuussisuuneqarfiata sakkortussuvaa pineqaatissinneqarsimasunut inissiisarfimmiittussanngortitaanera ullunut 60-inut aalajangiiffigigamikku pinerluttulerinermi inatsimmi taamanikkut 16, aamma 70 maannakkut 37 aamma 98 siorasaarineq aamma pisortat oqartussaatitaannik narrunarsaarineq politiinut iliuuserisimagamiuk. Ullormi 18. april 2011 Ilulissat eqqartuussisoqarfianni eqqartuunneqarpoq qaammatini arfinilinni pineqaatissinneqarsimasunut inissiisarfimmiittussanngorlugu ilaatigut pinerluttulerinermi inatsimmi 113 unioqqutissimallugu aserorterineq politiinut iliuuserisimallugu, nakuusernermilu pinngitsuutinneqarluni isersimaqatiminut politiit ilisimannittoq pissarsiarisinnaasimanngimmassuk. 10. oktober 2011 unnerluutigineqartoq eqqartuunneqarpoq qaammatini 9-ni pineqaatissinneqarsimasunut inissiisarfimmiittussanngorlugu ilaatigut aserorterinermut, nakuusernermut, siorasaarinermullu imerniartarfiup sulisuinut. 10. september 2013 unnerluutigineqartoq eqqartuunneqarpoq ukiuni marlunni qaammatinilu pingasuni pineqaatissinneqarsimasunut inissiisarfimmiittussanngorlugu ilaatigut pisortat oqartussaatitaannut narrunarsaarinermut, anstaltbetjentimut siorasaarinermut, isersimaqatiminut sakkortuumik nakuusernermut ilaatigut taxanik aquttoq toqqusassisimallugu. Eqqartuussummi tassani pisimasut 7-iusuni 6-ni pisuutinneqarpoq tigummigallarneqarnermini iliuuserisaani. 14. november 2014 unnerluutigineqartoq qaammatini 5-ni pineqaatissinneqarsimasunut inissiisarfimmiittussanngortinneqarpoq pisuutinneqarluni tallimariarluni pisortat oqartussaatitaannik narrunarsaarisimasutut kiisalu ikiaroornartoq pillugu nalunaarummik unioqqutitsineq pineqaatissinneqarsimasunut inissiisarfimmiitinneqarnermi nalaani, tamannalu sakkortusaataavoq. Eqqartuussutini tamakkunani takuneqarsinnaavoq unnerluutigineqartup pingaartumik unioqqutitsiffigisarsimagai nakuusernerit, siorasaarinerit aamma pisortat oqartussaatitaannik narrunarsaarinerit, kiisalu ikiaroornartoq pillugu nalunarummik unioqqutitsinerit. Naak eqqartuussutit assigisaanik pinerluuteqarnerit arlalissuugaluartut, pineqaatissiissutigineqartartut unnerluutigineqartumut pinaveersaartitsissutaasarsimanngillat, ilikkassutaasaratillu, illuatungaanilli unnerluutigineqartup iliuuserisartagai sakkortusiartorsimallutik, oqarluaannarluni avatangiisini tamaasa sioranartumik iliuuseqartarnermigut aqutarilersimagai, pingaartumillu pisortat oqartussaatitaannut
ataqqinnissuseqarani. Eqqartuussisut eqqartuussinerup ingerlanera tamaat maluginiarsimavaat, unnerluutigineqartoq suli annertuumik timimi atorneratigut sioranarpasittumik pissusilersortoq, unnerluussisussaatitaasunut pingaartumillu ilisimannittunut. Periataarnermigut, isinik annernartunik isiginninnermigut imaluunniit sorlummigut nipilimmik silammut anersaapiloorluni, unnerluussisussaatitaasut, ilisimannittut imaluunniit illersuisoq iluarinngisaminik oqaaseqaraangata qisuariarfigisarlugit. Taamatuttaaq eqqartuussisut maluginiarpaat, ilisimannittut qissasinngikkunik, nipimikkut timimikkullu sajuttartut imaluunniit qanimikkut panertuuittarlutik unnerluutigineqartoq takuinnarlugu. Unnerluutigineqartup ilisimannittut iseraangata utoqqatserfigisarpai, qulaani taaneqartutut pissusilersorfigisarlugit iluarinngisaminik oqaaseqaraangata. Unnerluutigineqartup taassumalu illeruisuata suliap eqqartuussivimmi suliarineqarnerani oqaatigivaat, unnerluutigineqartoq Herstedvesterimiinnermini imminut assut qiviarsimasoq. Ilaatigut maannakkut unnerluutigineqartoq imminut qamuuna takusinnaalersimalluni, eqqarsaatigisalersimallugu avatangiisiminut qanoq qisuariartarnerini qanoq kinguneqartarsinnaanersut. Ullaakkut makinnissani ilinniarsimallugu, iganerlu ilinniarsimallugu. Retslægerådimilu amerlanerussuteqartut nalilersimavaat inuttut pissusimigut assut akornusersimasoq assingusunillu pinerluuteqaqqinnissaa ilimanaateqartoq, inatsimmilu tassani 161 malillugu tigummineqarallarnissaanut eqqartuunneqarnissaata pinnginnissaa. Inuttut pissutsimigut immikkuullarissusia pissutigalugu innersuussutigineqassaaq pillaatissap aallartinnissaa Herstedvesterimi pineqaatissinneqarsimasunut inissiisarfimmi aallartinneqassasoq. Oqaatigineqassaaq retslægerådep innersuussutigisaa, Kalaallit nunaanni pinerluttulerinermi inatsimmi tunngavissaqartinneqanngimmat, unnerluutigineqartup inissinneqarnissaata Herstedvesterimi pineqaatissinneqarsimasunut inissiisarfiani aallartinneqarnissaanut. Eqqartuussivimmullu vagtmester ilisimannittoq 12-mit paasissutissiissutigineqarpoq Kalaallit Nunaani matoqqasumik inissiisarfeqanngimmat immikkut ilinniarsimasunik sulisulimmik, Danmarkimilu pissutsit assigalugit periarfissaqarani unnerluutigineqartup inissiisarfimmut matoqqasumut nuutinneqarsinnaanissaanut. Eqqartuussivimmullu aamma paasissutissiissutigineqarpoq isersimasuutit sakkortunerusumik pissusillit Nuummut nassiunneqartarmata, Nuummi pineqaatissinneqarsimasunut inissiisarfik sulisut tungaatigut piukkunnarnerummat. Taamaakkaluartorli Nuummi inissiisarfiup unnerluutigineqartoq aqussinnaasimanngilaa unnerluutigineqartup kamalluni inunnillu aqutsiniarluni pissusilersortarneratigut. Retslægerådip isumaqatiginngilaa unnerluutigineqartoq Kalaallit Nunaanni pinerluttulerinermi inatsisaani 161-imut attuumassuteqartinneqarsinnaanera. Taamaakkaluartoq eqqartuussisut
isumaqarput Nakorsaanerup D-p ikinnerussuteqaraluarluni innersuussineratut, nakorsaanerullu psykiatrimi TA-p tapersiineratigut, pinerluttulerinermi inatsimmi 161 naapertorlugu, pissutsit piviusut tunngavigalugit tulluarnerpaassasoq unnerluutigineqartoq suliami immikkuullarissumi immikkut pillugu aalajangersimasumik sivisussusiligaanngitsumik Danmarkimi pinerluttunut Isumaginnittoqarfimmit aqunneqartumik tarnimikkut nappaatillit napparsimmaviannut nakkutigisassanngortitsisoqartariaqartoq naleq. Pinerluttulerinermi inatsimmi 161, imm. 2. Eqqartuussisut nalilerpaat periarfissaq pitsaanerpaajusoq unnerluutigineqartup pisarialimmik ikiorneqarnissaa pissutigalugu Danmarkimi pinerluttunut isumaginnittoqarfimmit tarnikkut katsorsaasartunik aqunneqartumik tigummineqarallartussanngortitaaguni. Taassuma saniatigut eqqartuussisut isumaqarput tamanna inuiaqatigiit soqutigisaannut naapertuuttuusoq iliuuserineqarsimasut assinginik pisoqaqqinnginnissaanut aammalu unnerluutigineqartup inuttut atugarisaani tamanna tunngavilerneqarluni. Eqqartuussisut sakkukillisaataasinnaasumik nassaarsinnaasimanngillat. TAAMAATTUMIK EQQORTUUTINNEQARPOQ: Unnerluussaq pineqaatissinneqassaaq piffissami aaliangigaanngitsumi tarnikkut katsorsaasartunik aqunneqartumik inissiisarfimmi, Danmarkimi pinerluuteqarsimasunut isumaginnittoqarfiup ingerlataani, paarineqassalluni. Virna Fencker